Shyhrete Behluli me dashurinë për këngën, sinonim për gruan e suksesshme

Dëshira e vajzave për të kënduar, këtu e dekada më herët, nuk ishte e pranuar shumë nga opinioni i gjerë në Kosovë. Aq më shumë kur këto vajza që armën më të fortë e kishin zërin, nuk kishin përkrahjen e rrethit dhe shoqërisë. Ishte “marre” të këndojë një vajzë. Nga pentagrami muzikorë jetësorë në Kosovë ka pasur jo pak emra këngëtaresh që talentin e tyre në muzikë e kishin promovuar dhe se kishin ndalur asnjëherë, para shumë e shumë vitesh. Lehtë nuk ishte as për fillimit e një prej zërave më të pëlqyer në Kosovë, për tash e sa vite. Shyhrete Behluli, është njëra nga zonjat e mëdha të skenës muzikore shqiptare.

Ajo kujton se si asnjëherë nuk pranoi të hiqte dorë nga muzika, ngase atë e kishte dashuri të pashtershme dhe frymëmarrje të vërtetë.

Behluli : Nuk duhet hequr dorë nga ëndrra për bindjet e të tjerëve

“Vështirësia e parë ka qenë mentaliteti, atëherë vështirë ka qenë me u pajtua me vajzën e asaj kohe, e plus kur ajo ka qenë nga fshati, që me e pas një aktivitet siç ka qenë kënga. Nuk ka qenë e lehtë, nuk ka qenë e lehtë për shkak të rrethit, ka qenë vështirë me e kuptua se si një femër mundet me pas të lejuar një aktivitet te tillë. Kjo ka qenë bindja e të tjerëve, por nuk është mirë me ndërpre një aktivitet, një dëshirë, një talent. Dhe unë për vete kam pas fat ngase jam rritë me një familje që e kanë dashtë këngën” tha Behluli.

Dhe e gëzon fakti që sot koha ka vërtetuar një sistem ndryshe. Gjërat kanë marrë formën e duhur, duke u dhënë të drejta femrave që ato të kenë të drejtat e tyre dhe të mund të jenë të punësuara apo të angazhuara kudo ku talenti dhe vullneti i tyre i përcakton, thotë për KosovaPress zonja e muzikës shqipe, Shyhrete Behluli.

Behluli: Tash gruaja ka të drejta dhe mund të jetë prezentë çdo kund

“Tash është pak më ndryshe, është një kohë e gjatë dhe gjërat janë më ndryshe. Tash femra ka të drejtat e veta. Çdo kund mundet me qenë prezentë, me zhvillu punën e saj, me zhvillu talentin e saj, ka përkrahjen e familjes, rrethit, shoqërisë. Kështu që dallon shumë koha nga atëherë me kohën e tashme. Por gjithmonë ka qenë dhe do të jetë që nëse është e fortë dëshira dhe vullneti i çdo femre, ajo ka për të arritur atje ku dëshiron”,tha Behluli.

E fortë dhe e guximshme ka qenë gjithmonë f emra shqiptare, për çka është dëshmuar në luftë, thotë këngëtarja Behluli, e cila tutje numëron të arriturat dhe angazhimet e femrave shqiptare në shumë raste e sfera të jetës në Kosovë.

Nga ana tjetër, simbolikën e Ditës së Gruas, Shyhrete Behluli e pret me mjaftë dashuri, sidomos për dhuratat që merr dhe jep, e që përtej luleve është dashuria.

Behluli: Për 8 Mars marr vetëm lule dhe dhuroj lule me plotë dashuri

“Si zakonisht për 8 Mars marr lule dhe dhuroj vetëm lule, pasi që lulet janë simbol i dashurisë. Edhe vetë dashuria për nënën, për motrën, për të gjitha femrat është ma tepër si lule, kështu që unë me simbolikë marr e dhuroj lule me aq sa kam mundësi”, thotë ajo.

Nga ana tjetër, zonja e skenës Shyhrete Behluli, si çdo vit tjetër edhe për këtë 8 Mars do të jetë në mesin e shumë grave duke i argëtuar me zërin e saj të ëmbël dhe plotë dashuri. Këngëtarja këto ditë ka publikuar edhe një këngë që i kushtohet dashurisë së nënës, një bashkëpunim me rep këngëtarin Gold Ag./gazeta blic/