Shumë subvencione të bujqësisë në duart e matrapazëve

Fermerët e vërtetë lihen anash, MBPZHR-ja jep ndihma për blerje votash. Brahimaj: Shumica e parave përfundojnë të klientela për blerje të votave

“Kjo bëhet nga individët që janë në vendimmarrje, për ndarjen e këtyre ndihmave. Tashmë ky rrjet është krijuar dhe për pasojë nuk mund të marrësh grante po qe se nuk e ke dikë në atë komision, që t’ia japësh një pjesë të këtyre mjeteve që i përfiton”, thotë deputeti Salih Salihu. Zyrtarët e Ministrisë thonë se ka kontroll të lartë deri në detaje për ndarjen e subvencioneve

Deputetë nga radhët e opozitës dhe ekspertë të bujqësisë kanë bërë akuza në adresë të stafit drejtues të Ministrisë së Bujqësisë se ata janë duke manipuluar me fondet e kësaj ministrie, dedikuar subvencioneve për bujqit kosovarë. Përfaqësues të opozitës kanë akuzuar drejtuesit e tashëm të Ministrisë së Bujqësisë dhe Pylltarisë, por edhe Agjencinë për Ndarjen e Granteve Bujqësore, se ata po i keqpërdorin fondet për fermerët kosovarë. Sipas tyre, nga fondet e Ministrisë së Bujqësisë po përfitojnë më shumë fermerët matrapazë dhe mashtrues sesa fermerët e vërtetë.

Veç tjerash, ka pasur akuza se nga fermerët që përfitojnë grante po u kërkohet një pjesë e këtyre fondeve që po zhvaten nga pushtetarët e kësaj ministrie. Ndërkaq, këto akuza ndaj ministrisë së tyre, të bëra nga opozita, i ka mohuar zyrtari Shkelzen Dragaj, këshilltar në MBPZHR-së.”Konstatimet janë të pavërteta, sepse ka kontroll super të lartë dhe deri në detaje”, tha Dragaj. Sipas tij, falë mbështetjes së MBPZHR-së, është rritur për 26 për qind prodhimi në dy vitet e fundit. Dragaj nuk ka treguar se sa veta kanë aplikuar dhe sa kanë përfituar nga grantet e kësaj ministrie për 2015.

Nga buxheti i shtetit, për sektorin e bujqësisë në vitin 2015 janë ndarë mbi 60 milionë euro. Ndërkaq, sipas planifikimeve të bëra nga Ministria e Bujqësisë, për pagesa direket (subvencione) janë ndarë rreth 32 milionë euro, ndërsa për grante investive 20 milionë euro./kosova sot/