Shtyrja e seancës për Specialen – nga neglizhenca apo frika!?

Të premten, më 29 maj, është shtyrë seanca e Kuvendit të Kosovës në të cilën ishte paraparë që të shqyrtohet amendamenti për ndryshime kushtetuese, që i hapin rrugë themelimit të Gjykatës Speciale.Analisti Shpend Kursani ka theksuar se nuk ka pritur se do të ndodhte kjo, por se do të ketë vështirësi për grumbullimin e 80 votave të nevojshme për votimin e ndryshimeve kushtetuese.

Ai ka thënë se deputetët e Kuvendi të Kosovës janë të vetëdijshëm për pasojat e themelimit të kësaj gjykate, sikurse kanë qenë të njohur edhe me pasojat e marrëveshjeve tjera të dëmshme, si marrëveshja e 19 prillit 2013 për normalizimin e marrëdhënieve Kosovë- Serbi, Ligji për Amnisti etj.

“Për këtë arsye, njësoj sikurse gjërat tjera të dëmshme për Kosovën, edhe për Gjykatën Speciale pritej se nuk do të ishte i lehtë diskutimi dhe votimi për të. Po ashtu, pritet që shumica e deputetëve të Kuvendit të Kosovës të shantazhohen nga ambasadat e ndryshme në Kosovë dhe nga disa raste edhe nga Serbia, që këto ndryshime të dëmshme për vendin të votohen. Kuvendi i Kosovë edhe njëherë do të shërbejë dhe do të përdoret si teatro për një skenar gjoja të funksionimit të demokracisë, por ai është vetëm inskenim i saj”, ka thënë Kursani.

Sipas tij mes deputetëve të opozitës ka edhe inate me pozitën, ndaj nuk është vështirë të dihet pse nuk e votojnë Specialen.

“Janë disa deputetë të shumicës parlamentare, që kanë frikë për konsekuencat të cilat mund të pasojnë në rast të mos votimit të Gjykatës Speciale. Sipas mendimit tim, ata me këtë veprim po ia hapin qelinë e burgut vetes së tyre. Shumë pak prej tyre e kanë për shkaqe patriotike – shumica i frikësohen qelisë”, ka shtuar Kursani.

Analisti Petrit Zogaj, ka theksuar se shtyrja e seancës tregon për mungesën e seriozitetit të Kuvendit të Kosovës, institucion i cili nuk ka qenë në gjendje që ta kompletojë materialin (amendamentet kushtetuese) për një çështje kaq të rëndësishme.

Ai ka thënë se kjo tregon papërgjegjshmërinë e institucioneve të Kosovës, përballë një vendimi i cili, sipas tij, është një nga më të rëndësishmit për Republikën e Kosovës.

“Mendoj se kemi deputetë dhe parti politike, të cilëve u mungon përgjegjësia institucionale. Disa deputetë, për interesa meskine nuk e kanë votuar Specialen. Ata nuk kanë arritur ta kuptojnë se imazhi i Kosovës duhet të jetë në rend të parë dhe jo interesat e tyre. Kjo është njëri nga treguesit më të mirë që tregon nivelin e kësaj klase politike”, ka shtuar Zogaj. /Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).