Shtëpitë e kurbetçarëve, në shënjestër të hajnave

Dukuria e vjedhjeve të pasurisë private në Kërçovë ka shënuar shifra alarmante.

Brenda dy muajve në Kërçovë janë shënuar 94 vjedhje, ka njoftuar kohë më parë policia e Kërçovës. Të shpeshtën e rasteve pre e hajdutëve janë pronat private, e në veçanti shtëpitë e kurbetçarëve, nga ku po vidhen stoli të ndryshme, pajisje teknike, e diku edhe para të gatshme.

Gjatë janarit policia e Kërçovës ka regjistruar 37 vjedhje, nga të cilat 34 konsiderohen si të rënda. Vjedhje ka pasuar edhe gjatë muajit shkurt dhe ato kanë arritur shifrën e 57 delikteve, prej të cilave 40 konsiderohen të rënda dhe 17 të lehta. Gjatë dy muajve të shkuar policia e Kërçovës ka arritur të zbulojë autorët e 20 vjedhjeve.

Siç raporton gazeta „Koha“ e Shkupit, ky fenomen ka kohë që po shqetëson qytetarët kërçovarë, në veçanti mërgimtarët, të cilët jo rrallë janë ballafaquar me demolime të skajshme të banesave dhe shtëpive të tyre.

Shumica e qytetarëve po diskutojnë dhe po flasin se policia duhet të jetë më aktive në këtë pikëpamje dhe të veprojë në gjetjen e këtyre keqbërësve, të cilët në një formë po shtojnë pasigurinë dhe po varfërojnë buxhetin e familjeve, nga të cilat një pjesë bukur e madhe e pjesëtarëve të këtyre familjeve ndodhen me status të rënduar social si pasojë e krizës së përgjithshme ekonomike dhe papunësisë, e cila dita-ditës është duke shënuar rritje drastike./albinfo.ch/