Shtatori, ‘i nxehtë’ për Kosovën dhe Serbinë

Takimi i tretë në kuadër të fazës finale të dialogut në Bruksel, ku do të diskutohet edhe për bashkimin e Luginës së Preshevës me Kosovën, vizita e presidentit Aleksandër Vuçiq në Kosovë dhe publikimi i një plani nga autoritetet e Serbisë, si dhe protestat e paralajmëruara nga opozita për ndërprerjen e bisedimeve me shtetin fqinj, janë këto disa nga zhvillimet “e nxehta” politike që pritet të ndodhin gjatë muajit të ardhshëm, shkruan sot Gazeta “Zëri”.

Muaji shtator pritet të nisë me zhvillime tejet të rëndësishme për Republikën e Kosovës. Në fillim të këtij muaji do të mbahet takimi i tretë në kuadër të fazës finale të dialogut Kosovë – Serbi.

Nga Presidenca tashmë kanë bërë të ditur se në këtë tryezë do të diskutohet për çështjen e Luginës së Preshevës, respektivisht për kërkesën e shqiptarëve të Luginës për bashkim me Kosovën.

Gjatë këtij muaji po ashtu pritet që në Kosovë të vijë presidenti serb Aleksandër Vuçiq, i cili ka bërë të ditur se do të dalë me një plan të detajuar për zgjidhjen e “çështjes së Kosovës”.

Pos këtyre, së shpejti pritet të vendoset edhe për fatin e Asociacionit të Komunave me Shumicë Serbe (AKS), ndërkohë që ka kundërshti të thella në mes të palës kosovare dhe asaj serbe për themelimin e AKS-së.