Shtatëdhjetë dëshmitarë kundër Naser Kelmendit

Njëri nga 70 dëshmitarët në rastin e Naser Kelmendit është Zijad Turkoviq, kundër të cilit Kelmendi kishte dëshmuar në prill të vitit 2012. Turkoviq është dënuar me 45 vjet burgim për vepra penale të ngjashme me ato që po ndiqet penalisht Naser Kelmendi.

Prokuroria Speciale e Kosovës ka zbuluar të hënën në seancën e parë fillestare se ka një listë prej 70 dëshmitarësh. Tre prej tyre janë dëshmitarë bashkëpunues, të cilët sipas Prokurorisë kanë qenë bashkëpunëtorë të Kelmendit në veprimet kriminale përfshirë vrasjen dhe trafikimin ndërkombëtar të drogës, shkruan Koha Ditore.

Prokurori Andrew Hughes ka lexuar aktakuzën me nëntë pika të rënda. Prokuroria e ngarkon Kelmendin se ka drejtuar një grup të madh kriminal, pjesë e të cilit ka qenë edhe ish-ministri boshnjak i Mbrojtjes, Fahrudin Radonçiq, i cili deri vonë ka qenë pjesë e Qeverisë boshnjake. Radonçiq është pronar i gazetës “Dnevni avaz”.