Shqiptari vret një bashkëkombëse në Zvicër

Sot në orët e paradites është plagosur për vdekje në mes të fshatit Fisslibach një shqiptare e moshës 26 vjeçare.

Vrasësi i dyshuar është një shqiptar i moshës 35 vjeçare. Mediet zvicerane njoftojnë se qytetarët në Fisslibach kanë qenë dëshmitarë të vrasjes brutale me thikë. Policia ka gjetur në hyrjen e një ndërtese gruan e plagosur rëndë e cila vdiq menjëherë, në vendin e ngjarjes, përcjell albinfo.

Fillimisht dorasi ka ikur këmbë nga vendi i ngjarjes por ai është kapur së shpejti nga policia e kantonit. Sipas policisë, me rastin e arrestimit ai i ka shkaktuar vetes plagë me thikën e tij por megjithatë ajo ka arritur ta arrestojë. I plagosuri është bartur në spital. Është konstatuar se bëhet fjalë për një shtetas 35 vjeçar të Shqipërisë pa qëndrim në Zvicër.

Sipas policisë, duhet të jenë njohur në mes vete, thotë policia, e cila nuk ka ende të dhëna për lidhjen eventuale në mes tyre.
Po ashtu nuk njoftohet për motivet e mundshme të vrasjes.
Nga ana tjetër, qytetarët në Fisslibach kanë pësuar tronditje nga akti i rëndë. Sipas tyre, një akt të tillë të rëndë ky fshat nuk ka përjetuar asnjëherë deri më tash.