Shqiptari ua prish hesapet mundësve zviceranë

Mundësi i vetëm shqiptar, Naim Fejzaj, të dielën ngjitet në ringun e Ditës Federale të mundësve juniorë për Zvicrën lindore që mbahet në Entlebuch.

Synimi i tij është i qartë: “Unë dua të bëj pjesë në mesin e më të mirëve”, thotë Fejza.

Gjithsej në këtë garë do të marrin pjesë 150 mundës juniorë.

Tinejxheri 100-kilogramësh bën pjesë në delegacionin prej 12 anëtarësh të Zvicrës lindore. Frikë nga kundërshtarët nuk ka fare.

“Por, ka vetëm respektin e nevojshëm ndaj tyre”, shprehet ai.

Mundësi i vetëm shqiptar, Naim Fejzaj, u ka rënë në sy edhe mediave zvicerane.

“20min” shkruan se Naim Fejzaj është një përjashtim në skenën e sportit tradicional të mundjes ose “Schwingen”, siç njihet në Zvicër. Kosovari konsiderohet talent i madh.

Ai është një nga entuziastët më të medhenj në Zvicrën lindore. 17-vjeçari që nga viti 2007 është pjesë e klubit të mundjes Wolfhalden.

Gasser Rolf, kryetar i Shoqatës zvicerane të mundjes, tha se vetëm një për qind e mundësve kanë prejardhje të huaj. Aktualisht shoqata ka 5000 mundës aktivë.

Një koleg e kishte joshur Fejzen për pesë vjet që t’i bashkangjitet në stërvitjet e mundjes. “Nuk isha edhe aq i intersesuar”, thotë Fejza. Por, pavarësisht se nuk kishte treguar interesim, ai vazhdonte të ishte i pranishëm në stërvitje.

“Gjithmonë ishte më interesante”, thotë Fejzaj. Talenti i kosovarit u zbulua shumë shpejt.

Në pjesëmarrjen e tij të katërt në festën e mundësve ai arriti në finale

Por, nuk e kishte edhe aq lehtë. “Më është dashur që shpesh të dëgjoj shprehje të rënda”, thotë Fejzaj.

Kështu, ai është ngacmuar në lidhje me mbiemrin e tij ekzotik, ose është pyetur: “Çfarë do ti këtu?” Mirëpo, momentet e këtilla nuk kanë mundur t’ia marrin atij kënaqësinë që ka për sportin e mundjes. “Unë, në raste të tilla, përpiqesha që thjesht të evitoja ngatërresat”, thotë Fejzaj.

Naimi Fejza ka lindur në Zvicër. 30 vjet më parë prindërit e Fejzës kishin migruar në Zvicër. Babai i tij është nga Kosova, ndërsa nëna është nga Kroacia. Fejza bashkë me nënën e tij në moshën shtatëvjeçare kishin marrë nënshtetësinë zvicerane.

Si i vogël kishte treguar interesim për sportin. Naimi ishte në fillim pjesë e një klubi të xhudos dhe hendbollit.

Kur ai filloi me sportin e mundjes, së pari duhej t’u shpjegonte prindërve në lidhje me këtë sport zviceran.

“Ata nuk e dinin se çfarë sporti mund të jetë mundja”, thotë 17-vjeçari.(albinfo.ch)