Shqiptari i Helsinborgu-t: Dua të vishem kuqezi, por s’kam ftesë

Emri i Loret Sadikut është përmendur si përforcim i radhës i Kombëtares shqiptare. Por mbrojtësi i ekipit suedez Helsingborg, nuk është në dijeni për një interesim të tillë nga ana e FSHF-së.

Ai thotë se nuk ka pasur asnjë informatë nëse është vëzhguar javën e kaluar nga menaxheri i përfaqësueses, Alban Bushi.

“Nuk jam në dijeni nëse Kombëtarja shqiptare është e interesuar për mua. Nuk kam biseduar me askënd për këtë punë dhe nuk e di nëse dikush më ka vëzhguar tha Sadiku për gazetën kosovare “Express”

Gjithsesi, Sadiku është i hapur. Ai thotë se është i gatshëm ta pranojë një ftesë nga ekipi kuqezi, nëse kjo vjen. “Normalisht, jam i gatshëm të luaj për Shqipërinë. Do të ishte një gjë e mirë për mua”, ka theksuar mbrojtësi kosovar.

Sadiku ka luajtur tri ndeshje me përfaqësuesen U-21 të Suedisë. Ai ka pranuar se nuk pret ftesë nga ekipi A i Suedisë.

Me siguri, nëse De Biasi vendos ta ftojë në ekip Sadikun, Federata Shqiptare e Futbollit duhet ta përdorë të njëjtën strategji, sikurse bëri edhe me Migjen Bashën, që ta marrë dritën e gjelbër nga FIFA.