Shqipëria pret fitore më 29 maj

Gjykata e Arbitrazhit Sportiv (CAS) pritet ta bëjë të ditur vendimin për ndeshjen Serbi – Shqipëri, më 29 maj. Kjo datë është paralajmëruar zyrtarisht nga Federata Shqiptare e Futbollit, e cila kishte bërë ankesë në CAS-i, nga e cila ka kërkuar që t’i jepen tri pikët e asaj ndeshje të ndërprerë.

“CAS-i pritet të japë vendimin për ndeshjen Serbi – Shqipëri në datën 29 maj. Gjithashtu mund të ketë vonesa në varësi të hetimeve që po realizon kjo gjykatë sportive. Ndeshja Serbi-Shqipëri u luajt në datën 14 tetor 2014 dhe u ndal për shkak të dhunës që u ushtrua nga tifozeria e vendasve kundrejt futbollistëve tanë. Ne kemi shpresë për një qëndrim dinjitoz dhe korrekt ndaj Kombëtares sonë. Një qëndrim në favor të Shqipërisë është në favor të futbollit, duke i thënë STOP urrejtjes dhe racizmit në sportin më të dashur”, thuhet në njoftimin e FSHF-së. /Zëri/