Shqipëria ia sheh hairin humbjeve

Përkundër dy humbjeve të fundit në dy ndeshjet miqësore ndaj Rumanisë dhe ndaj Hungarisë, Kombëtarja e Shqipërisë është ngritur për katër pozicione në renditjen e FIFA-s për muajin qershor, duke u rehatuar në vendin e 66-të.

Në këtë mënyrë, skuadra e De Biasit ka bërë hapa përpara në klasifikimin e FIFA-s, ku me 495 pikët e tubuara deri më tani ka lënë prapa edhe përfaqësuese të tilla si Polonia apo Irlanda. Ndryshe, nëse ia hedhim një sy listës në përgjithësi, shohim se në prag të Kampionatit Botëror ka lëvizje në 10 pozitat e para.

Spanja dhe Gjermania kanë ruajtur pozicionet në krye, ndërsa i treti del Brazili, që e lë Portugalinë të katërtën. Ngritje kanë pësuar edhe Argjentina me Zvicrën, që ngriten nga dy shkallë për tu klasifikuar në vendin e pestë dhe të gjashtë. Hapa të rëndësishme për të dyja këto kombëtare, që në vigjilje të kampionatit botëror vlejnë më shumë në aspektin psikologjik.