Shqipëria beson

Kombëtarja shqiptare do ta zhvillojë një ndeshje të rëndësishme ndaj Danimarkës të shtunën në “Elbasan Arena”, në kuadër të kualifikimeve për “Euro 2016”, i cili do të mbahet në Francë.

“Kuqezinjtë” e mposhtën Portugalinë në udhëtim 1:0, duke e nisur në mënyrë fantastike kampanjën kualifikuese. Ndërkaq, tash, ekipi i Gianni De Biasit është më i vendosur se kurrë më parë, që të grumbullojë sa më shumë pikë në ndeshjet që pasojnë. “Unë besoj në fitore kundër Danimarkës”, ka shkruar mbrojtësi Taulant Xhaka në llogarinë e tij në rrjetin social, “Facebook”.

I bindur në fitore ndaj danezëve është edhe qendërmbrojtësi Mërgim Mavraj. “Do të mundohemi t’i fitojmë tri pikë ndaj Danimarkës, por edhe ndaj Serbisë, për ta ruajtur pozitën e mirë në renditje”, është shprehur futbollisti kosovar.

Ditë më parë, në një bisedë me “Zërin”, optimist për një rezultat pozitiv ndaj ekipit të Morten Olsenit ishte shprehur edhe përzgjedhësi i Shqipërisë, Gianni De Biasi.

Danezët: Ndeshja me Shqipërinë, e rëndësishme

Danezët e konsiderojnë si mjaft të rëndësishme ndeshjen që do ta zhvillojnë të premten ndaj Shqipërisë. Futbollisti Nicolai Boilesen është i fokusuar tërësisht te dueli me kuqezinjtë, pas së cilit, danezët do të luajnë me Portugalinë, javën e ardhshme.

“Na presin dy ndeshje mjaft të rëndësishme. Është e rëndësishme të fokusohemi fillimisht në atë të parë, ndaj Shqipërisë”, deklaroi futbollisti i Ajaxit.

Përzgjedhësi Olsen i ka ftuar qendërmbrojtësit Jores Okore e Mattias “Zanka” Jorgensen për duelin me Shqipërinë, për shkak të lëndimit të treshes në mbrojtje, Daniel Agger, Simon Kjaer e Andreas Bjelland. Këtyre tre të fundit do t’ju bëhen teste një ditë para lojës, për të vendosur përfundimisht nëse ndonjëri prej tyre eventualisht mund të luajë në Elbasan.

Olsen i ka paralajmëruar lojtarët e tij se nuk do të kenë punë aspak të lehtë në Shqipëri, pasi e konsideron ekipin e De Biasit si mjaft të rrezikshëm kur luan në shtëpi./zeri/