Shpreson të mos kthehet duarthatë

Modelja Antigona Sejdiu pas kurorëzimit me çmimin e parë në “Miss World Kosova 2013”, ka nisur përgatitjet për të përfaqësuar vendin në evenimentin “Miss World 2013” që do të mbahet në 28 shtator të këtij viti në Indonezi. Aktualisht modelja na bën të ditur se është duke u trajtuar te qendra e dobësimit “Linda Halimi” për të pakësuar kilogramët e tepërt.

“Tani jam duke u përgatitur intensivisht, gjegjësisht po trajtohem te qendra e dobësimit ‘Linda Halimi’, ku po ushtroj në fitnes etj., në mënyrë që ta mbaj trupin në formë dhe të jem vitale gjatë performancës sime që do të kem më datën 28 shtator në ‘Miss World 2013’ që do të mbahet në Indonezi”, ka thënë ajo për “Zëri”.

Antigona tani peshon 55 kg, por ajo synon që të humbë edhe disa kile deri në paraqitjen e saj në këtë manifestim. Qëllimi i saj në këtë garë është që të kthehet me ndonjë çmim. “Secila konkurrente hyn në garë me qëllimin për të fituar, por e them sinqerisht se asnjëherë nuk mendova se do të mund ta realizoja këtë qëllim që pata në ‘Miss World Kosova’. Ka qenë mjaft sfiduese por edhe interesante dhe e bukur, sidomos për faktin që për mua ishte diçka krejtësisht e re. Ndërkaq tani jam më e përkushtuar se kurrë për pjesëmarrjen në ‘Miss World 2013’, ku do të mundohem që ta përfaqësoj Kosovën sa më denjësisht. Ndërkaq sa i përket çmimeve natyrisht që çmimi i parë është tejet i vështirë të rrëmbehet duke marrë parasysh numrin e konkurrenteve, por të paktën kam shumë shpresë që nuk do kthehem duarthatë”, thotë ajo.

Antigona do të mundohet të bëjë më të mirën për Kosovën në Indonezi dhe pas kësaj të merret me modelizëm edhe jashtë vendit. “Do bëj më të mirën për vendin tim dhe për karrierën time si modele”, ka thënë në fund ajo.