Shoqata e shkrimtarëve “Feniks” nga Lugina uron 21 marsin, ditën botërore të poezisë…

Të dashur anëtarë të Shoqatës së Shkrimtarëve “Feniks” (Preshevë, Bujanoc dhe Medvegjë), të nderuar kolegë krijues anekënd botës shqiptare, në emër të Shoqatës së Shkrimtarëve “Feniks” u uroj 21 Marsin- Ditën Botërore të Poezisë. Të nderuar miq krijues, kjo datë tanimë na zuri në një gjendje të jashtëzakonshme të shpallur nga shumë vende të botës e njëra nga to edhe shteti ku jetojmë, si pasojë e pandemisë së koronavirusit, shpallur nga organizata botërore e shëndetësisë, dhe me këtë edhe kanë pushuar të gjitha aktivitetet kulturore dhe letrare.

Kjo pandemi që na ka shpallur “luftë” është tinzare, prandaj duhet të ruhemi në masë të madhe, në mënyrë që ta fitojmë edhe këtë betejë, e më pas të vazhdojmë me aktivitetet tona kulturore e letrare.

Shoqata e Shkrimtarëve “Feniks”, pati aranzhuar dy orë letrare dhe atë në dy shkolla të komunës së Preshevës, si dhe një aktivitet në bashkëpunim me Bibliotekën e Qytetit “Mehmet Jusufi” në Preshevë, por për shkak të rrethanave më të njohura u anuluan dhe u shtynë për një kohë më të përshtatshme për t’u zhvilluar.

Që nga viti 1999, 21 marsi është shpallur nga UNESCO, Dita Botërore e Poezisë. Vendimi i marrë në kongresin e 30-të të kësaj agjencie, zhvilluar në Paris, ka si objektiv kryesor mbështetjen e diversitetit linguistik përmes shprehjes poetike.

Në të njëjtën kohë, caktimi i një dite ndërkombëtare për poezinë bëhet edhe me qëllimin për t’i kthyer kësaj gjinie të letërsisë funksionin e saj të parë, traditën gojore.

Edhe pse të bllokuar nga pandemia, ju të respektuar miq, shkruani, lexoni dhe kësaj radhe të vetëizoluar ta festojmë këtë datë me rëndësi për poetët dhe për poezinë në përgjithësi.
Shpresojmë fuqishëm se kjo gjendje në të cilën gjendemi, mos të zgjas shumë, e ne të vazhdojmë me takimet tona, me mbajtje të orëve letrare, manifestimeve të karakterit kulturor, në mënyrë që të ecim drejt sukseseve tona si në planin individual krijues, por edhe në atë kolektiv.

Po ashtu urojmë që në të ardhmen mos të “sulmohemi” nga asnjë pandemi të këtij formati, por të jemi të lirë në jetën tonë normale dhe në kushte të favorshme në secilën fushë të jetës…Gëzuar!

Bilall Maliqi, kryetar

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).