Shkon në 13 numri i të prekurve me koronavirus në Kosovë

Janë regjistruar edhe katër raste të reja të prekura me koronavirus në Kosovë, kështu duke shkuar në 13 numri i përgjithshëm i të infektuarve.

Ministri i Shëndetësisë, Arben Vitia, ka bërë të ditur se janë regjistruar edhe katër raste të reja të infektuar me koronavoirus, raporton lajmi.net.

Vitia ka bërë të ditur se katër personat e prekur janë nga fshati Stubëll e Vitisë, familjarë të ngushtë të pacientit të diagnostikuar pozitiv me COVID-19, me datë 13.03.2020.

“E gjithë familja kanë qenë në vetizolim dhe Instituti Kombëtar i Shëndetit Publik ka bërë testimin edhe të familjarëve të tjerë”, ka shkruar në rrjetin social Facebook ministri Vitia.

Njoftimi i plotë i ministrit Vitia, pa ndërhyrje:

Të nderuar qytetarë,

Mbrëmë vonë, bazuar në rezultatet e testimeve u konfirmuan edhe katër raste të reja pozitive me COVID-19.

Të katër rastet janë nga fshati Stubëll e Vitisë, familjarë të ngushtë të pacientit të diagnostikuar pozitiv me COVID-19, me datë 13.03.2020.

E gjithë familja kanë qenë në vetizolim dhe Instituti Kombëtar i Shëndetit Publik ka bërë testimin edhe të familjarëve të tjerë.

Në këtë situatë vetëdija dhe ndihma e juaj është e domosdoshme. Mbani distancë nga tjetri. Reduktoni daljet veç në raste emergjente. Ndiqni rekomandimet nga Ministria e Shëndetësisë dhe Instituti Kombëtar i Shëndetit Publik.

Ju faleminderit për mirëkuptim!. /Lajmi.net/