Shkolla “Thimi Mitko” merr primatin në nivel kombëtar në lëndën e kimisë

Gjilan – Viteve të fundit SHFMU “Thimi Mitko” po shquhet me rezultate kulminante në fusha të ndryshme në nivel kombëtar.

Një nga sukseset e mëdha të kësaj shkolle është ajo e arritur në lëndën e Kimisë në olimpiadën e Vll-të të radhës të organizuar nga Kolegji “Mehmet Akif” në bashkëpunim me MASHT-in.

Në finalen e garave kombëtare nga lënda e Kimisë ishin kualifikuar katër nxënës nga po kjo shkollë (më 7 nëntor 2015), kurse në finalen e këtyre garave të mbajtura më 26.03.2016, vendin e pare e zuri nxënësi i klasës së tetë të kësaj shkolle Lindrit Jahiu dhe fitoi bursën 100%, por suksese arritën edhe nxënësit tjerë finalist nga kjo shkollë në këtë garë duke fituar bursën prej 50% (Era Kurteshi dhe Lorinë Bajrami).

Për një sukses të tillë të këtyre nxënësve meriton lëvdata edhe menaxhmenti i kësaj shkolle, por domosdo këto merita i atribuohen edhe profesoreshës së Kimisë pranë kësaj shkolle Merlinda Daku, e cila me punën e saj të palodhshme bëri që këta nxënës të kenë mundësinë e sukseseve dhe reflektimit të shkathtësive të tyre në këtë fushë.

Profesoresha Daku suksese të mëdha ka arritur edhe vitet e kaluara duke arritur që nxënësit e saj të arrijnë së paku një nga tri vendet e para të këtyre garave kombëtare./rajonipress/