Shkolla, nxënësit e shteti i Kosovës ishin dashuria e mësuesit e veprimtarit të madh Bejtullah Ismajli

Gjilan – Veprimtaria dhe kontributi i mësuesve ndër vite ishte jashtëzakonisht i madh, ata përpos që po edukonin fëmijët kishin edhe një qëllim që ta duan atdheun e tyre dhe ta largonin një herë e përgjithmonë analfabetizmin duke ju hapur dritën e diturisë nxënësve. I tillë ishte mësuesi Bejtullah Ismajli, i cili një jetë të tërë i’a kushtoi nxënësve dhe popullit të tij.

Bejtullah Ismajli lindi në vitin 1935 në fshatin Kopërrnicë, ndërsa në moshën 17 vjeçare të vitit 1952 mori ditarin në dorë duke dhënë kontribut të madh në fshatrat e Komunës së Kamenicës – në Svircë, Poliqkë, Dazhnicë e Hogosht, ndërsa nga viti 1957-58 filloi të kontribuon në shkollën e fshatit të tij në Kopërnicë gjerë në vitin 1964, ku njiherit edhe mbaron Shkollën Normale në Gjilan.

Dashuria ndaj shkollës e nxënësve nuk kishte të ndalur, pasi mësuesi Bejtullah Ismajli fillon të jep mësim nga viti 1965 në Gjilan në shkollën fillore “Vuk Karagjigj” – tani “Thimi Mitko”, ndërsa rrugëtimin e tij të mësimdhënësit e vazhdon nga viti 1973 në shkollën fillore “Selami Hallaqi” ku njiherit ishte iniciator që kjo shkollë të mban emrin e dëshmorit të kombit Selami Hallaqi.

Mësuesi Bejtullah Ismajli thoshte, “Mësuesit kanë një rolë në jetën e tyre, të hapin rrezet e diturisë e të zhdukin errësirën e mos shkollimit të nxënësve shqiptar e në veçanti të gjinisë femërore”. Gjithë diturinë dhe dashurinë për nxënësit, mësuesi Bejtullah Ismajli i mori nga dy mësuesit e tij të dalluar nga Kavaja e Shqipërisë – Fehmi Sineva e Sali Qilerxhiun.

Dashurinë për atdheun e mori nga prindi i tij, Sadik Sinan Ismajli, një njeri i devotshëm për çështjen kombëtare, i cili ishte një patriot i kohës, poashtu axhën e tij Rexhepin dhe Halilin shovenistët serb i’a kishin masakrua, ndërsa agjën Shukriun çdo ditë forcat policore komuniste serbe e malltretonin në stacionin policor në Hogosht e Kamenicë, poashtu inspirimin e madh e mori edhe nga vëllai i tij Rifati i cili për katër vite ishte zënë rob lufte nga Gjermanët të cilin e mbajtën në Dortmund të Gjermanisë.

Mësuesi Bejtullah Ismajli ishte betuar se përpos nxënësve dhe shkollës shqipe, ai do të kontribuon për çështjen e popullit kosovarë për të qenë të pavarur. Edhe pas pensionimit mësuesi Bejtullah Ismajli dha kontribut të jashtëzakonshëm kur pushteti serb në fillim të viteve të 90-ta kishte shtuar torturat ndaj popullit shqiptarë, duke vrarë ushtarë e duke larguar punëtorët nga vendet e punës, ku kishin ndalur mjetet e informimit e nxënësit i kishin larguar nga objektet shkollore dhe po bëheshin diferencimet politike, me një fjalë pushteti serb po shkatërronte gjithçka që ishte shqiptare.

Mësuesi Bejtullah Ismajli menjëherë i bashkëngjitet Lëvizjes Demokratike të Kosovës e udhëhequr nga dr.Ibrahim Rugova, duke u betuar se nuk ka ditë më të madhe të japësh diturinë e jetën për popullin kosovarë se në këto momente.

Takimet të cilat i kishte me dr.Ibrahim Rugovën në fillim të viteve të 90-ta, për mësuesin Bejtullah Ismajlin ishin sinjal se kishte ardhur dita që në emër të babait të tij Sadikut, axhallarve Rexhepit, Halilit e Shukriut e vëllait Rifatit, të qojë në vend amanetin e tyre për kauzën shqiptare drejt lirisë.

Mësuesi Bejtullah i bashkëngjitet karvanit të Anton Qetës për pajtimin e gjaqeve duke dhënë një kontribut tejet të madh për të zhdukur ngatërresat të cilat ishin me decenie. Forcat serbe duke e parë veprimtarin e mësuesit Bejtullah, e arrestojnë në cilësinë e kryetarit të Komunës së Gjilanit, por ai qëndroi i pa luhatur në rrugëtimin e tij për çlirimin e popullit.

Në arrestimin e parë në vitin 1991, mësuesi Bejtullah ishte plot 90 ditë në burgun e Gjilanit, i cili u maltretua skajshmërisht në mënyrën më mizore, por pas daljës nga burgu mësuesi Bejtullah vazhdon aktivitetin e tij edhe më fuqishëm duke kontribuar natë e ditë për çështjen kombëtare.

Në vitin 1995, pushteti serb e burgos përsëri duke e dënuar për tetë muaj, ndërsa torturat ishin shtazarake duke e lënë me pasoja në veshkët e tij. Mësuesi Bejtullah gjatë karrierës së tij prej mësuesit e veprimtarit të çështjes kombëtare, kishte mbledhur materiale duke shpresuar se një ditë do ti boton ato, por fatkeqësisht gjatë arrestimit në shtëpinë e tij forcat serbe ja konfiskojnë duke mos e parë dritën e botimeve. Mësuesi i shumë gjeneratave mbi 40 vjeçare e njeriu që e deshti këtë tokë e kontribuoi për të, ndërroi jetë me 25 shtator të viti 1997 në moshën 62 vjeçare nga maltretimet të cilat i bënë pushteti serb./rajonipress/

Shpërndaje.
© RAJONIPRESS