Shkolla “Nazim Hikmet” organizoi orë letrare për nder të festës së flamurit

Sot, më 27 Nëntor 2023, në bibliotekën e shkollës “Nazim Hikmet” në Dobërçan, u mbajt “Orë letrare” për nder të 28 Nëntorit – Ditës së Flamurit Kombëtar.

Ky aktivitet është përgatitur nga mësimdhënësit: Bahrije Shabani, Reshat Ramadani dhe Besart Berisha, ndërsa të pranishëm ishin poetë të shquar të Anamoravës, si: Sabit Rrustemi, Ramadan Mehmeti, Albina Idrizi, Mehmetali Rexhepi, Nexhat Rexha dhe Baki Krasniqi, të cilët me pjesëmarrjen e tyre e bënë më madhështore këtë ditë feste, duke dhuruar edhe librat e tyre për bibliotekën dhe nxënësit tanë.

E veçanta e këtij aktiviteti ishte prezantimi i poezive të këtyre poetëve nga nxënësit, të cilët ishin ulur përballë tyre. Ndërsa, pas prezantimit ata morën edhe nga një libër dhuratë me autograf të autorëve.

Drejtori i shkollës, z. Fadil Shabani, i përshëndeti dhe i falënderoi poetët për pjesëmarrjen e tyre në këtë aktivitet, në veçanti për faktin se, falë vullnetit dhe dëshirës për të sjellë tituj të ndryshëm të librave të tyre, tani biblioteka e shkollës është pasuruar, dhe këta libra do të jenë në dispozicion për nxënësit tanë.

Për rëndësinë historike të 28 Nëntorit, foli arsimtari i historisë, Rexhep Arifi.

Pas përfundimit të aktivitetit, për mysafirët ishte përgatitur edhe një koktej rasti nga kolektivi i shkollës sonë.

URIME 28 NËNTORI – DITA E FLAMURIT KOMBËTAR DHE PAVARËSISË SË SHQIPËRISË!
FESTOFSHIM GJITHMONË SË BASHKU!