Shkolla e futbollit “GS Gjilan” përfiton një donacion

Gjilan – Të pranishëm në kuadër të këtij organizmi ishin Ambasadori i Shqipërisë në Kosovë, Qemal Minxhozi; zv.Ministri për Kulturë Rini dhe Sport, Qazim Rrahmani; prokurori i Prokurorisë Themelore Gjilan Arben Ismajli; Komandanti i Stacionit Policorë në Gjilan, Major Remzi Azemi, Kryetari Gjykatës Themelore Gjilan Afrim Shala; Trajneri i përfaqësueses së Kosovës, Muharrem Sahiti; Anëtari i Federatës së Futbollit të Kosovës Bekmi Rexhepi, e shumë të ftuar të tjerë.

Në këtë organizim u bë shpërndarja e seteve sportive për nxënësit e kësaj shkolle nga donatori Inter Plast – Trocal.

Donacionin e vlerësoi si shumë të nevojshëm Halil Halili trajner në këtë shkollë, i cili veç tjerash tregoi për arritjet e kuadrove të dala nga kjo shkollë.

Po ashtu, edhe Shpend Terziu, kryetar i këshillit të prindërve të shkollës së futbollit “GS Gjilani”, u shpreh i kënaqur me përfitimin e këtij donacioni, që sipas tij do të jetë motivim që fëmijët të punojnë edhe më shumë në të ardhmen.

Ndërkaq gjatë një fjale rasti Ambasadori i Shqipërisë në Kosovë, Qemal Minxhozi, u shpreh i nderuar që ishte pjesë e këtij organizmi, dhe i vlerësoi si shumë frytdhënëse donacionet e tilla.

Sipas Minxhozit fëmijët janë ata të cilët kanë më së shumti nevojë për mbështetje institucionale në mënyrë që të rriten me kujdesin që atyre u takon.

Përveç kësaj në këtë organizim Minxhozi premtoi se në një të ardhme së bashku me Federatën e Futbollit të Kosovës do të bëhet organizimi i një kampionati mbarë kombëtarë. “Këtu në Gjilan, do të vijnë të luajnë nga çdo trevë shqiptare, këtë premtim po ua jap këtu sot juve dhe do të punojmë për të”, u shpreh veç tjerash Minxhozi.

Po ashtu fjalën e morri edhe zv.Ministri për Kulturë Rini dhe Sport Qazim Rrahmani, i cili vlerësoi lart donacionin në fjalë dhe potencoi se gjeneratat e reja janë pasqyrë e jona e cila reflekton punën e shoqërisë dhe institucioneve të vendit tonë karshi zhvillimit të talentit të këtij brezi si dhe premtoi mbështetje nga ana e ministrisë.

Gjithashtu edhe trajneri i përfaqësueses së Kosovës, Muharrem Sahiti u shpreh i privilegjuar me pjesëmarrjen në këtë organizim dhe çmoi lart punën e trajnerit të kësaj shkolle Halil Halili. Po ashtu premtoi edhe mbështetjen e FFK-së./rajonipress/