Shkoj si refugjate në Kanada, tani është administratore në Gjykatën e Albertas

Gjilan – Majlinda Mehmeti – Ukshini i kishte vetëm 11 vite kur së bashku me tërë familjen nga Bibaj e Ferizajit u largua nga Kosova pasi shpërtheu lufta. Tani ajo ka kryer Fakultetin e Shkencave Politike dhe Sociologjinë në Alberta të Kanadasë dhe aktualisht është administratore e shkallës së lartë në Gjykatën Provinciale të Albertas.

Majlinda Mehmeti – Ukshini nuk e ka menduar asnjëherë se fati i saj dhe i familjes së saj do ta gjejë në një moshë të re jashtë vendlindjes dhe jashtë moshatareve të saja. Lufta e Kosovës nuk e kurseu as atë dhe as familjen e saj.

I kishte vetëm 11 vite kur dhunshëm dhe nën përcjelle të armëve të ushtrisë e policisë serbe detyrohet ta braktisë Kosovën bashkë me prindërit. Në tërë këtë fatkeqësi ajo pas shumë peripecive arrin të shkojë në Kanada ku edhe sot jeton e punon.

Majlinda edhe sot e ka të vështirë të kujtojë ato ditë frike e trishtimi. “Vërtet isha e re dhe kisha frikë të madhe. Është e vështirë për një fëmijë kur kërcënohesh nga ushtar e paramilitar serb të dehur. Por fati deshi që ne të largohemi nga Kosova për tu vendosur përfundimisht në Alberta të Kanadasë” rrëfen Majlinda.

Majlinda tani ka kryer fakultetin e shkencave politike dhe sociologjinë dhe aktualisht është administratore e shkallës së lartë në kontabilitetin e Gjykatës së Trafikut.

Majlinda thotë se tani është e lumtur që ka arritur të kryej me sukses ato që në jetë ka dashur. “Tani po vijë në Kosovë e relaksuar dhe krenare sepse unë e prezantojë Kosovën në shumë aktivitete të ndryshme. Kma zgjedhur një profesion që e dua shumë dhe më kryesorja tani kam mundësi që edhe vendin tim ta ndihmojë e përkrah përmes përvojës sime” shprehet Majlinda./rajonipress/