Shkilet marrëveshja Thaçi- Mustafa

Isa Mustafës për herë të dytë po i dështon marrëveshja me Kryeministrin Thaçi. Lideri i LDK’së kishte deklaruar se është marrë vesh për ndryshimet e nevojshme ligjore sa i përket zgjedhjeve deri në gjysmën e parë të këtij muaji. Por, kjo nuk ndodhi as sot pasi PDK kishte braktisur Kuvendin e Kosovës.

Kuvendi i Kosovës në mungesë kuorumi ka shtyrë seancën ku do të diskutohej për Ligjin për Zgjedhjet.

Kjo është shtyrja e parë, e cila do të ndikojë në shtyrjen e zgjedhjeve nacionale, për të cilat ishin marrë vesh Isa Mustafa dhe Hashim Thaçi.

Në fakt, Thaçi dhe Mustafa ishin marrë vesh që Ligji për Zgjedhjet të votohej më së largu në gjysmën e muajit mars, ndërkohë, as dy javë më vonë nuk arriti të kaloi në Kuvendin e Kosovës, transmeton express.

Kjo nuk është hera e parë që Isa Mustafës i dështojnë marrëveshjet me Hashim Thaçin.

Lideri i LDK’së me marrëveshjen që pati bërë me Kryetarin e PDK’së në prillin e vitit të kaluar kishte “detyruar” Qeverinë të përfundonte mandatin brenda tri vitesh.

Madje, Mustafa për një kohë të gjatë pati deklaruar se ka arritur sukses të madh pasi po ia shkurton mandatin Qeverisë.