Shkëlzen Gashi: Qytetarët nuk u besojnë opozitarëve – dy nga ta janë milionerë

Pjesëmarrjen e vogël të qytetarëve në protestën e sotme të opozitës kundër Qeverisë, e kanë komentuar edhe analistët.
Shkëlzen Gashi, thotë se kjo pjesëmarrje justifikohet me faktin se qytetarët nuk u besojnë as opozitarëve kur ata bëjnë thirrje për “ç’kapjen” e shtetit.

Gashi, në një prononcim për Klan Kosova, ka thënë se si mund t’ju besohet opozitarëve kur ata protestojnë kundër korrupsionit e ku dy prej tyre janë milionerë.

Ndërsa, duke përmendur një nga kërkesat e protestës, atë për RTK-në, Gashi ka thënë se edhe këta opozitarë që sot po kërkojnë depolitizimin dhe defamiljarizimin e televizionit publik, do të vepronin njëjtë sikur të ishin në pushtet.

“Si liderët e AAK-së ashtu edhe ata të Nismës, kanë familjarë të punësuar në RTK. Ndërsa, liderët e Vetëvendosjes nuk do të punësonin familjarët e tyre në televizionin publik, por këtë do ta bënin duke punësuar militantë partiakë”, ka thënë Gashi.