Shkëlqimi me Alanyasporin, Fidan Aliti po kërkohet nga gjiganti turk

Fidan Aliti është duke zhvilluar sezonin e tretë te skuadra turke Alanyaspor, ku është bërë një nga futbollistët më të rëndësishëm.

Mbrojtësi kosovar është lider në mbrojtjen e kësaj skuadre, por ai mund të ndryshojë skuadër në afatin kalimtar dimërorë.

Telegrafi merr vesh nga burime të afërta me futbollistin dardan, se Aliti tanimë është në negociata me gjigantin turk Trabzonspor.

Trajneri i Trabzonspor, Fatih Tekke ka punuar më parë me Alitin te Alanyaspor dhe dëshiron të ribashkohet me kosovarin në Trabzon.

Palët janë duke diskutuar për termat e kontratës, derisa dëshira e lojtarit është të bëjë një hap para në karrierë, duke iu bashkuar Trabzonsporit, që po lufton për titullin.

Aliti ka kontratë me Alanyasporin deri në verën e vitit 2028, derisa Trabzon është e gatshme të paguajë 1 milionë euro dëmshpërblim për transferimin e tij.

Javët e ardhshme janë vendimtare për Alitin, i cili sot vlerësohet si një nga mbrojtësit më stabil në elitën e futbollit turk. /Telegrafi/