Shkëlqimi i Hadergjonajt në Zvicër

Brazili ka pasur një mbrojtës të djathë që është quajtur perfekt për pozicionin e tij, të madhin Cafu. Mirëpo edhe Kosova ka një talent të madh që premton shumë në të ardhmen si mbrojtës i djathtë. 19-vjeçari, Florent Hadergjonaj, nga Deçani është duke u paraqitur me mjaftë sukses tek skuadra e famshme zvicerane Young Boys, ku ka zënë edhe vendin e titullarit tek verdh e zinjtë. Së fundmi talenti kosovar arriti të shënojë edhe gol në fitoren e skuadrës së tij 2:1 si vendas përballë Thunit.

Në një prononcim për Arenën, Florenti, është shprehur shumë i kënaqur me ecurinë e ndeshjeve që është duke zhvilluar tek Young Boys, ku shpreson të ketë vazhdimësi të njëjtë. “Momentalisht jam shumë i kënaqur me paraqitjet që kam bërë deri tashti tek skuadra ime. Shpresoj që të ecin punët kështu deri në fund”, u shpreh fillimisht Florenti për Arenën.

Tutje biondi 19-vjeçar ka treguar edhe arritjen e tij deri tek skuadra e parë e Young Boys. “Deri në skuadrën e parë kam arritur falë punës së madhe që kam bërë. Kam fituar besimin e trajnerit Uli Forte dhe kjo është e rëndësishme për mua. Kur të punosh me përkushtim të madh, atëherë mund të arrish gjithçka”, u shpreh Hadergjonaj…(Tribuna – Arena).