Muri i Mitrovicës pritet të rrënohet gjatë këtij muaji nga autoritetet kosovare, pasi që i njëjti nuk është rrënuar deri dje nga niveli lokal, duke mos e respektuar as Rezolutën e Kuvendit të Kosovës për rrënimin e tij.
Kuvendi javë më parë ka miratuar një rezolutë, e cila kërkon që muri të rrënohet gjatë muajit janar 2017, përderisa Qeveria e Kosovës duhej të angazhohej që organet kompetente për trajtimin e ndërtimeve pa leje t’i ndërmarrin të gjitha veprimet ligjore për murin që është në ndërtim e sipër në pjesën e urës se Ibrit”.I njëjti, të trajtohet si veprim politik dhe ndërtim pa leje”, thuhej mes të tjerash në Rezolutën e Kuvendit, shkruan sot Gazeta “Zëri”.
Rrënimin e murit e kanë paralajmëruar edhe presidenti Hashim Thaçi, kryeministri Isa Mustafa, si dhe kryeparlamentari Kadri Veseli. Madje ky i fundit ka thënë se nëse serbët nuk e rrënojnë murin, “ekskavatorët e Ministrisë së Mjedisit do të nisen për ta rrënuar”.
Mediet në vend kanë shkruar të martën se përfaqësuesja speciale e BE-së në Kosovë, Natalya Apostollova dhe kryeministri i Kosovës, Isa Mustafa, janë përpjekur që të bëjnë marrëveshje me kryetarin e Mitrovicës së Veriut, Goran Rakiq, që ai vetë ta rrënojë murin.
Por, kryetari i Mitrovicës së Veriut, Goran Rakiq, duke demantuar marrëveshjen e arritur për rrënimin e murit nga vetë autoritetet e Komunës Veriore, ka thënë se “nuk është arritur kurrfarë marrëveshje me delegaconin e Prishtinës në lidhje me murin mbrojtës në këtë qytet, për rrënimin e të cilit po insistojnë përfaqësuesit politikë të shqiptarëve./zeri/
