Shifrat alarmante të papunësisë

Papunësia në kategorinë e moshës më të re në Kosovë deri në 24 vjeç është në rritje. Raportet e fundit të Agjencisë së Statistikave të Kosovës dhe të Ministrisë së Punës dhe Mirëqenies Sociale tregojnë për një trend shqetësues të rritjes së shifrave të papunësisë. Madje, të papunët e pakualifikuar kapin një shifër mbi 56 mijë të regjistruar.

Musa Demiri, zyrtar për informim në Ministrinë e Punës dhe Mirëqenies Sociale, ka thënë se gjatë vitit 2014 numri i të papunëve është rritur për 11,9 për qind. “Papunësia për 12 muaj tregon rritje afërsisht prej 11,9%, duke krahasuar me numrin e të regjistruarve nga viti paraprak (2013), po ashtu sikurse femrat edhe meshkujt janë rritur në regjistrime prej 13,1% përkatësisht 10,9%”, ka thënë ai.

Sipas tij, në vitin 2014 zyrat e punësimit kanë punësuar 4667 persona të regjistruar si të papunë. Ndërkaq, ekspertë të ekonomisë kanë thënë se shkalla e papunësisë duhet të jetë një shqetësim i madh për Qeverinë e Kosovës./zeri/