Shfuqizohet marrëveshja për punësimin e kosovarëve në Gjermani

Arsyeja për shfuqizimin e këtij memorandumi është pamundësia e realizimit të projektit për punësim në Gjermani, sipas kërkesave të përcaktuara.

Është shfuqizuar memorandumi në mes të MPMS dhe kompanisë gjermane “HOWL.L.C” që parashihte punësimin e kosovarëve në Gjermani. Siç sqarohet në një njoftim të publikuar në portalin e Ministrisë së Punës dhe të Mirëqenies Sociale, ministri Nenad Rashiq, në bazë të kompetencave të postit që mban ka bërë këtë shfuqizim. Pamundësia për të plotësuar kërkesat dhe kriteret e parapara, ka qenë shkas për shfuqizimin e memorandumit.

Vendimi i ministrit ka ardhur duke u bazuar në kompetencat e tij kushtetuese dhe konform legjislaturës të aplikueshme për administratën shtetërore të Republikës së Kosovës, thuhet në njoftimin e Ministrisë së Punës dhe Mirëqenies Sociale,

“Duke u nisur nga moszbatimi i memorandumit të mirëkuptimit i lidhur në mes MPMS-së dhe kompanisë “HOWL.L.C”, ministri ka marrë vendim mbi shfuqizimin e memorandumit të mirëkuptimit i lidhur në mes MPMS-së dhe kompanisë “HOW L.L.C” më 16 nëntor 2012, që kishte për qëllim punësimin e shtetasve të Republikës së Kosovës në shtetin e Gjermanisë. Arsyeja kryesore për shfuqizimin e këtij memorandumi është pamundësia e realizimit të projektit nga ana e shtetasve të Kosovës për t’u punësuar në Gjermani, sipas kërkesave dhe kritereve të përcaktuara në këtë memorandum”, thuhet në fund të njoftimit të MPMS-së.