Shërojnë kancerin për tetë ditë

David Aponte është shëruar nga leukemia, falë trajtimit që bazohet në “qelizat T”, që është një trajtim i njëjtë me atë që shëroi edhe vajzën shtatëvjeçare, Emma Whitehead. Shërimi i Aponte’s është kryer në spitalin Memorial Sloan-Katteing, në New York, dhe ka zgjatur vetëm tetë ditë.

Falë një terapie gjenetike, shkencëtarët amerikanë arritën që brenda vetëm tetë ditëve të shërojnë një formë të pashërueshme të leukemisë, nga e cila vuante punonjësi i televizionit ABC, David Aponte. Aponte u shërua me një trajtim të njëjtë të ‘qelizave –T’ të virusit të dobësuar të HIV’it, me të cilat paraprakisht u shërua edhe vajza 7-vjeçare, Emma Whitehead.

Në fakt, pas shërimit të plotë të Emma’s, mjekët e spitalit Memorial Sloan-Kettering, në New York, vendosën që trajtimin e njëjtë ta provonin edhe tek të rriturit. Edhe pse trajtimi nuk pati sukses tek të gjithë, shërimi i plotë i David Aponte zgjati vetëm tetë ditë, pas së cilës periudhë nga trupi i tij u zhdukën të gjitha gjurmët e leukemisë.

Ilaç i mundur edhe për lloje tjera të kancerit

E njëjta terapi eksperimentale u aplikua edhe në katër pacientë, tek të cilët gjurmët e leukemisë u zhdukën pas tetë javëve. Revista ‘NewScientist’ njofton se njëri nga ta më vonë vdiq për shkak të mpiksjes së gjakut, e cila gjë nuk kishte lidhje me terapinë, përderisa një tjetër vdiq pas kthimit të sëmundjes.

Sa i përket tre të shëruarve nga sëmundja deri tani e pashërueshme e leukemisë limfoblastike – në mesin e të cilëve është edhe Aponte – ata tani po kalojnë nëpër fazën e remisionit, e cila mund të zgjas prej pesë muajve deri në dy vjet.

Michel Sadelain, që është udhëheqës i ekipit të mjekësve të spitalit Memorial Sloan-Katteing, ku edhe u shpik kjo terapi, deklaroi se edhe 50 pacientë të tjerë janë të gatshëm për fazën e dytë të testimeve klinike. Sipas tij, ekziston mundësia që këtë terapi ta aplikojnë edhe në llojet e tjera të kancerit.

Sipas revistës ‘NewScientist’, kompania Adaptimmune këtë terapi e shfrytëzoi vitin e kaluar si shërim testues tek 13 pacientë, të cilëve u ishte diagnostifikuar sëmundja e multiple mielomës, një sëmundje kjo e rëndë progresive e gjakut – respektivisht, një sëmundje malinje e qelizave të plazmës. Pas trajtimit, 10 pacientë kalaun në fazën e emisionit, dhe tek ata sëmundja nuk është rishfaqur deri më tani.

Paul Moss, nga Qendra Britanike për Hulmtime të Kancerit, deklaroi se, sipas njohurive dhe të arriturave të deritanishme, ‘qelizat-T’ paraqesin ardhmërinë për shërimin e të gjitha llojeve të kancerit.

Revista tjetër shkencore, ‘Nature Biotechnology’ ndërkaq shkruan se, çelësi i trapisë së re është përcaktimi i molekulave karakteristike për qelizat e llojit të caktuar të kancerit , pas së cilës gjë modifikohen qelizat mbrojtëse të pacientit, të cilat pastaj i sulmojnë qelizat dëmshme.

Për shembull, tek leukemia akute limfoblstike, qelizat mbrojtëse shndërrohen në malinje, dhe njihen si ‘qelizat-B’. Prandaj, si shënjestër, shkencëtarët amerikanë kanë përzgjedhur molekulën CD19, e cila është e pranishme vetëm në ‘qelizat-B’. Në fakt, nga të sëmurët me leukemi mjekët kanë izoluar një lloj tjetër të qelizave mbrojtëse, që njihen si ‘qeliza-T’, të cilat i kanë infektuar me virusin e dobësuar të HIV (i cili në këtë formë është i parrezikshëm për shëndetin e pacientit), për t’i rikthyer ndërkohë ato si qeliza “të riprogramuara” në organizëm.

Këto ‘qeliza-T’ të reja, gjegjësisht të ndryshuara, pastaj i sulmojnë ‘qelizat-B’, të cilat janë bartëse të molekulës së lartpërmendur CD19. Sipas pohimeve të ekspertëve, disa muaj pas terapisë organizmi i të sëmurit fillon që sërish të prodhojë ‘qeliza-T’ normale dhe ‘qeliza-B’ të shëndosha.(Express)