Sherifi: Ujdia mes Limajt dhe Kurtit ishte arritur, por u bllokua nga mungesa e 61 votave për qeveri

Bilall Sherifi, Sekretar i Përgjithshëm i NISMA-s, në një intervistë në emisionin Five në RTV Dukagjini, ka folur lidhur me bisedimet mes kreut të partisë së tij, Fatmir Limaj, dhe kreut të Lëvizjes Vetëvendosje, Albin Kurti.

Ai ka thënë se në bisedimet me Albin Kurtin kanë arritur ujdi në fillim të negociatave.

“Unë mendoj që ujdia është arritur në fillim: Kryetar Kuvendi – Fatmir Limaj, Kryeministër – Albin Kurti”, ka deklaruar ai

Sherifi ka shtuar se problemet kanë lindur pas arritjes së ujdisë.
“Nga momenti kur u pa që nuk ka arritur të sigurojë 61 vota për qeveri, dhe meqë nuk ka arritur t’i sigurojë ato, le të themi se procesi është bllokuar në zgjedhjen e kryetarit. Pra, sepse ishte i vetëdijshëm që nëse e nxjerr Fatmir Limajn, ai do të merrte vota dhe do të fillonin të rridhnin afatet kushtetuese. Kanë përdorur këtë veprim taktik, teknik – sido që ta quajmë – kur e kanë nxjerrë Albulenën, sërish të vetëdijshëm që nuk do ta votojë opozita”, ka thënë ai.

Theksojmë se në bazë të vendimit nga Gjykata Kushtetuese, deputët e Kuvendit të Kosovës nuk mund të mblidhen në një seancë deri më 8 gusht./Indeksonline/