Shërbimet publike të dobëta dhe larg pritjes së qytetarëve
Gjilan – Shërbimet publike vazhdojnë të jenë pika më e dobët e institucioneve komunale. Rrugë të prera e të lëna në gjysmë, rrugë të papastërta dhe parqet e mirëmbajtura keq janë vërejtjet që qytetarët i adresojnë pothuajse çdo ditë.
Shërbimet publike në Gjilan po përcillen me defekte të shumta duke treguar papërvojë totale në menaxhim dhe efikasitet.
Qytetarët po edhe pjesa e diasporës që tashmë ndodhen në Gjilan, kanë vërejtje të shumta ndaj këtij digasteri.
Murseli qytetar gjilanas thotë se ka shumë vende me rrugë të prera – asfalti për nevoja kryesisht të bizneseve dhe të njëjtat nuk rregullohen dhe nuk kthehen në gjendjen e mëparshme.
”Unë jetoj në pjesën afër parkut dhe aty është një gropë që është shkaktuar nga një punëkryes, kuptohet me lejen e shërbimeve publike. Janë bërë gati një vit dhe ajo gropë nuk është mbyllur” shprehet Murseli.
Rrugët gjithashtu pastrohen shumë rrallë ndërsa parqet mirëmbahen keq.
Naimi qytetar tjetër mendon se parku i qytetit e ka humbur komplet pamjen që e kishte dikur. “Aty kundërmon era nga papastërtia sepse e kanë lënë në harresë dhe pakujdesi totale” shprehet ai.
Agroni mendon se varrezat e qytetit janë në gjendje të mjerueshme.
“Unë vet jam në VV dhe i kam përkrah, po kur po shoh që vërtet nuk kanë punuar hiq po kam vërejtjet e mija të arsyeshme. Erdha nga Suedia për të vizituar varrezat dhe u trishtova nga gjendja e keqe që ishte aty. Ato duhet t`i mirëmbajë dhe kujdeset drejtoria e shërbimeve publike” mendon Agroni./rajonipress/