Sheqeri i frutave rrit dëshirën për më shumë ushqim

Fruktoza, sheqeri i gjendur tek frutat, mund të rrisë dëshirat për të konsumuar ushqime të larta në kalori. Në kuadër të një eksperimenti ( i publikuar në revistën “PNAS”), 24 vullnetarë konsumuan pije të pasura me sheqer gjatë një dite dhe pije të pasura me glukozë ditën tjetër.

Krahasuar me glukozën, pijet e pasura me fruktozë i bënë njerëzit të kishin më shumë dëshirë për të konsumuar biskota dhe ëmbëlsira të tjera (të larta në kalori).

Organizata Botërore e Shëndetësisë thotë se një sasi e vogël sheqeri çdo ditë (rreth 6 lugë çaji) bën mirë për organizmin, por jo më shumë.

Ushqime të pasura me shumë sheqer janë: biskotat, çokollatat, lëngjet e frutave.

Sipas raportimit të pjesëmarrësve në eksperiment, pas konsumimit të pijeve apo ushqimeve me përmbajtje fruktoze, dëshirat e tyre për të konsumuar ushqime të ëmbla rriten dukshëm. Edhe pse fruktoza përmban energji, është e dëmshme për trupin duke ndikuar në shtimin e peshës.

Ekspertët shkencorë janë duke shqyrtuar rezultatet e këtij eksperimenti dhe pritet të nxjerrin këshilla për konsumatorët./BBC News/Përgatiti: Elena Beta.