Shembull i bashkëpunimit qytetar në Zhegër: Pastrohen dhe mirëmbahen varrezat e fshatit, falënderohen donatorët për mbështetjen

Gjilan – Në prag të sezonit veror dhe vizitave të shumta të bashkatdhetarëve, në fshatin Zhegër është realizuar edhe këtë vit aksioni për kositjen, pastrimin dhe mirëmbajtjen e varrezave të fshatit, një aktivitet që tashmë është shndërruar në traditë dhe dëshmi e përkushtimit të komunitetit për ruajtjen e vendeve të kujtesës dhe respektit ndaj të ndjerëve.

Lajmin e ka bërë të ditur kryetari i fshatit, Qahil Halili, i cili në emër të Këshillit të Fshatit, Këshillit të Xhamisë dhe qytetarëve të Zhegrës ka shprehur mirënjohje të veçantë për të gjithë donatorët që kontribuuan financiarisht në realizimin e këtij aktiviteti.

Sipas tij, falë solidaritetit dhe gatishmërisë së qytetarëve, janë siguruar mjete në vlerë prej 1,000 eurosh, të cilat kanë mundësuar kryerjen e punimeve për pastrimin dhe rregullimin e hapësirave të varrezave.

“Edhe këtë vit u realizua me sukses kositja dhe pastrimi i varrezave të fshatit. Në emër të Këshillit të Fshatit, Këshillit të Xhamisë dhe të gjithë qytetarëve, falënderojmë donatorët për shumën e dhuruar dhe punëkryesin për angazhimin e treguar. Zoti i shpërbleftë ju dhe familjet tuaja”, ka deklaruar Halili.

Banorët e Zhegrës e kanë vlerësuar këtë iniciativë si një akt qytetarie dhe përgjegjësie kolektive, duke theksuar se mirëmbajtja e varrezave është jo vetëm obligim moral, por edhe shprehje e respektit për brezat që kanë lënë gjurmë në historinë e fshatit.

Ky aksion dëshmon edhe një herë se bashkëpunimi ndërmjet institucioneve lokale, komunitetit fetar dhe qytetarëve vazhdon të mbetet një nga vlerat më të rëndësishme të Zhegrës, duke kontribuar në ruajtjen e traditës, kulturës dhe kujtesës kolektive të fshatit./rajonipress/