Shefki Kuqi i dëshpëruar me situatën e tij

Sulmuesi kosovar Shefki Kuqi është i dëshpëruar me situatën që po kalon te skuadra e Premier Leagues së Skocisë, Hibernian. Kuqi 36-vjeçar po luan pak te Hiberniani. Ai së fundi është aktivizuar më 27 janar, ndërsa gjithsej ka 13 paraqitje, 12 prej tyre si zëvendësues. Startues ishte vetëm në ndeshjen e fundit. “Jam vërtetë i dëshpëruar me këtë situatë.

Qëllimi im ishte të luajë në nivel të lartë për Hibernianin, por duket që trajneri ka pasur plane tjera për mua”, ka thënë Kuqi të enjten për mediumet finlandeze.

Ai ka thënë se nuk është lojtar që troket shpesh në derën e trajnerit, por ka shtuar se do të ishte mirë që të marr përgjigje për atë se pse po qëndron vazhdimisht në bankë.

“Në janar trajneri më ka thënë se unë kam rol të rëndësishëm në skuadër. Lojtarët tjerë kanë pyetur pse nuk po luaj. Unë nuk e di përgjigjen. Mua më mbetet vetëm të shtrëngojë dhëmbët dhe të luftojë”, ka shtuar Kuqi.