Shea: Kosova të bëjë gjithçka për ta përshpejtuar anëtarësimin në NATO

Ish-zëdhënësi i NATO-s gjatë luftës në Kosovë, Jamie Shea tha për RTKlive se personalisht është i bindur se një ditë do të ketë lëvizje politike në Ballkanin Perëndimor dhe se Kosova do të bëhet anëtare e NATO-s.

Sipas tij detyra e Kosovës është të bëjë gjithçka që mundet për ta përshpejtuar atë proces.

Shea tha se është e rëndësishme që Kosova të deklarojë dhe të përsërisë se qëllimi i saj është anëtarësimi në NATO dhe të argumentojë në Bruksel dhe në kryeqytetet e NATO-s pse kjo është e mirë për NATO-n dhe për paqen dhe stabilitetin në Ballkanin Perëndimor.

“Kosova ka shumë miq që mund të ndihmojnë me këtë strategji të diplomacisë publike. Unë personalisht jam i bindur se një ditë do të ketë lëvizje politike në Ballkanin Perëndimor dhe se Kosova do të bëhet anëtare e NATO-s. Detyra e Prishtinës është të bëjë gjithçka që mundet për ta përshpejtuar atë proces”, theksoi Shea për RTKlive.

Për mundësinë që Republika e Kosovës, të bëhet pjesë e NATO në një kohë të shkurtër, Shea tha se Kosova ka ende shumë punë për të përmbushur standardet e NATO-s dhe të 31 aleatët duhet ta njohin Kosovën si një vend të pavarur përpara se anëtarësimi të mund të ecë përpara.

“Prania e qëndrueshme e ushtarëve të NATO KFOR-it në territorin e Kosovës më shumë se 24 vjet pas përfundimit të konfliktit në vitin 1999 nënvizon gjithashtu se Kosova ka ende shumë për të bërë për të përmirësuar kohezionin dhe stabilitetin e saj të brendshëm – edhe pse këtu është e vështirë të arrihet përparim nëse Beogradi nuk është partner kooperativ”, tha ai.

Ish-zëdhënësi i NATO-s gjatë luftës në Kosovë, Jamie Shea, tha se Kosova për të ardhmen e afërt prioritet duhet të jetë forcimi i partneritetit të përditshëm mes Kosovës dhe NATO-s dhe hapja e fushave më të thella të bashkëpunimit, si në trajnime, stërvitje të përbashkëta, prokurim dhe modernizim dhe arritjen e ndërveprueshmërisë të plotë me NATO-n.

“Me fjalë të tjera, të bëhet sa më shumë punë anëtarësimi përpara anëtarësimit se sa vetëm më pas”, theksoi Shea.

Për fuqinë e madhësinë ushtarake të Kosovës, Shea tha se për momentin Kosova mbrohet nga NATO dhe se nuk ka nevojë të zhvillohet një ushtri e madhe e Kosovës e cila do të përdorte burime të vlefshme që nevojiten për të krijuar vende pune, për të përmirësuar arsimin dhe për të ofruar shërbime më të mira sociale.

“Kosova duhet të zhvillojë një forcë e cila është ndërvepruese me NATO-n, por që është e qëndrueshme financiarisht në afat të gjatë dhe e balancuar kundrejt prioriteteve të tjera të shpenzimeve qeveritare. Këshillat e NATO-s për strukturat dhe buxhetet e forcave mund të jenë të dobishme për Kosovën këtu”, tha ish-zëdhënësi i NATO-s gjatë luftës në Kosovë, Jamie Shea.

Duke shtuar se Kosova i afrohet anëtarësimit në NATO dhe ekonomia e saj rritet dhe situata buxhetore përmirësohet, ajo mund të shikojë përsëri se çfarë lloj kontributi të ardhshëm ushtarak mund të japë në aleancë dhe si mund të përmbushë objektivin e NATO-s për shpenzimet e mbrojtjes prej 2% të PBB-së (apo GDP-së) dhe ajo duhet të arrijë atje në mënyrë progresive, jo brenda natës.