SHBA, amerikanëve: Festimet me armë, zakon në Shqipëri

Në sytë e Ambasadës Amerikane në Tiranë, Shqipëria mbetet një vend me nivel të lartë rrezikshmërie jo vetëm gjatë momenteve të tensionuara, por edhe gjatë festimeve.

Përmes një mesazhi sigurie në gjuhën angleze, që mban datën 28 dhjetor, Ambasada Amerikane njofton nënshtetasit e vet në Shqipëri të bëjnë kujdes nga fishekzjarrët dhe veçanërisht nga plumbat pa adresë të qëlluar nga festuesit.

“Nga plumbat qorrë të shtënë me armë zjarri për shkak të festimeve mund të pësohen plagë serioze, madje edhe vdekje”, shkruhet në mesazhin që ambasada u drejton shtetasve që gjenden në Shqipëri.

Si asnjë prej përfaqësive të tjera në vendet e rajonit, ambasada amerikane në Shqipëri u bën me dije qytetarëve të vet se fishekzjarret e të shtënat festive me armë janë një fenomen mëse i zakonshëm në vend dhe se momentet më të rrezikshme janë mesnata e datës 31 dhjetor dhe ajo e 1 janarit.

“Ambasada USA i informon qytetarët e vet se fishekzjarret dhe të shtënat festive me armë zjarri janë fenomen i zakonshëm në Shqipëri dhe shtohen ndjeshëm gjatë festave”, shkruhet në mesazhin e datës 28 dhjetor, raporton BW.

Më tej ambasada i këshillonte qytetarët amerikanë të bënin kujdes gjatë gjithë periudhës së festimeve, ndërkohë që i rekomandonte që fishekzjarret t’i kundronin nga një distancë e sigurt, por veçanërisht t’u rrinë larg turmave të mëdha ku njerëzit mund të qëllojnë me armë.

“Qytetarët amerikanë duhet të tregojnë gjithë kujdesin e nevojshëm gjatë sezonit të festimeve dhe rekomandohen t’i ndjekin fishekzjarret nga një distancë sigurie, veçanërisht gjatë natës së ndërrimit të viteve. Ambasada USA këshillon gjithashtu të gjithë qytetarët amerikanë të shmangin turmat e mëdha, ku individë shtinë me armë për të festuar”.