Shaqiri zbulon synimet me Liverpoolin
RajoniPress
18:34, 11 Prill, 2020
Xherdan Shaqiri e ka pranuar se sfida më e madhe me të cilën do të përballet tani Liverpooli është të qëndrojë në nivelin më të lartë dhe të jetë në garë për trofetë e mëdha çdo vit.
Skuadra e Jurgen Kloppit shijoi suksese të shumta gjatë 12 muajve të vitit 2019, përderisa arritën t’i grumbullojnë trofetë e Ligës së Kampionëve, Superkupës së UEFA-s dhe Kupës së Botës për Klube, transmeton Gazeta Express.
Liverpooli arriti ta krijojë një epërsi prej 25 pikësh në krye të tabelës së Premierligës para se futbolli të suspendohej shkaku i virusit Covid-19, që tani e ka vënë në dyshim trofeun e parë të Liverpoolit si kampion i Anglisë në 30 vjet.
Por, pavarësisht se a arrin Liverpooli të shpallet kampion i Anglisë këtë sezon, Shaqiri e ka vlerësuar si një arritje të madhe suksesin e skuadrës së tij këtë sezon.
“Titulli i Premierligës është veçanërisht shumë i rëndësishëm për këtë klub dhe për shumë prej lojtarëve këtu sepse jo shumë lojtarë kanë fituar trofe. Është e rëndësishme edhe për ata, gjithashtu”, ka thënë Shaqiri.
“Për disa vjet gjithmonë po vinte, po vinte dhe luanim mirë, por s’kishte titull. Ky klub i madh duhet të luftojë çdo vit për titullin. Tani më duket se mentaliteti fitues është këtu dhe është e rëndësishme, dhe e vështirë, të tentojmë të qëndrojmë në nivelin më të lartë. Kjo është sfida më e madhe për klubin tani”.
“Ishte një vit i pabesueshëm për ne në vitin 2019. Për fat të keq s’e fituam ligën, por ishte e mrekullueshme për Liverpoolin ta fitojë titullin e Ligës së Kampionëve. Për mua, ishte hera e dytë”.
“Nuk i harron kurrë ndjenjat e tilla, këto lloj trofesh që i fiton me skuadrën tënde. Dhe të festosh me tifozët, pas një kohë të gjatë që ata s’kishin festuar diçka kaq të madhe në qytet, ishte thjesht e mrekullueshme”.
“Potenciali për këtë skuadër është shumë i madh, mendoj se ne mund të shkojmë sa më lart që është e mundur. Por, ne kemi nevojë të qëndrojmë në gishtërinjtë tonë dhe të jemi në nivelin tonë më të mirë që të jemi shumë, shumë të suksesshëm”. /Gazeta Express/
