Shaqiri, sërish lëvdata nga Bekenbaueri

“Nga minuta në minutë bëhet më i mirë. Ai luajti në atë mënyrë sikur kurrë të mos ishte ulur në bankina”.

Legjenda gjermane e futbollit, Franz Beckenbauer, duket të jetë bërë një adhurues i futbollistit tonë, Xherdan Shaqirit. Nuk ka kaluar as një muaj kur “Kaiser Franz”-i i madh kishte shprehur keqardhjen se përse Shaqirin nuk e angazhojnë më shpesh në ndeshjet e Bajernit.

Ai sigurisht do ta meritonte këtë pasi që “kur hyn ai në lojë, sjell një frymë të gjallërie në fushë. Është një lojtar i jashtëzakonshëm”, ishte shprehur veterani 67 vjeçar, njëherësh kryetar nderi i Bajernit.

Dhe tash, menjëherë pas ndeshjes së të dielës, të Bajernit kundër Bremenit, ku Xherdani luajti nga minuta e parë, Beckenbaueri sërish shpreh entuziazmin e tij me “xhuxhin magjik”.

“Në fillim te ai sikur vërehet mungesa e praktikës. Por nga minuta në minutë bëhet më i mirë. Ai luajti në atë mënyrë sikur kurrë të mos ishte ulur në bankina (si rezervist).”, ka shkruar Bekenbaueri në kolumnen e tij të rregullt në gazetën gjermane “Bild”. Dhe kur Beckenbauer flet, dëgjon e gjithë bota e futbollit.(albinfo)