Shaqiri: Ribery, gjithnjë i gatshëm për ndihmë

“Është mirë të kesh Frankun në afërsi. Kur kam pyetje ose jam i pasigurt për ndonjë gjë, ai më ndihmon gjithmonë”.

Për shkak të pozicioneve të ngjashme që mbulojnë në fushë, ata duhej të ishin rivalë, por janë miq shembullorë. Xherdan Shaqiri 20 dhe Franc Ribery 29 vjeçar, përveç bashkëlojtarë në Bajern, janë edhe fqinj me njëri tjetrin.

“Është mirë të kesh Frankun në afërsi. Kur kam pyetje ose jam i pasigurt për ndonjë gjë, ai më ndihmon gjithmonë”, ka thënë lojtari që ka fituar tashmë edhe simpatinë e publikut të Bajernit, Xherdan Shaqiri, në një intervistë për gazetën germane “tz”.

Shaqiri, në dy nga tri ndeshjet e deritashme në bundesligë ka luajtur që nga fillimi, dmth në njëmbëdhjetëshen e parë. Por, në të dy rastet ai është angazhuar falë lëndimit të Ribery-t.

Megjithatë, shqiptari ambicioz beson se do të ketë vend për të në ekip edhe kur të gjithë lojtarët të jenë në gjendje të mirë. “Jam relativisht polivalent, mund të luaj në mesfushë në të gjitha pozicionet. Kjo është me siguri përparësi për mua”, ka thënë Shaqiri në intervistë.

Mbetet të shpresohet se këto cilësi Shaqiri do të ketë rastin t`i dëshmojë në ndeshjen e parë të bajernit në kuadër të Ligës së kampionëve kundër FC Valencia që luhet të mërkurën!