Shaqiri përgëzohet për spektaklin që dhuroi ndaj Lituanisë

Xherdan Shaqiri ka dhuruar spektakël të shtunën mbrëma dhe i ka siguruar Zvicrës një fitore bindëse me shifrat 4:0 në ndeshjen eliminatore për “Euro 2016” kundër Lituanisë.

Shaqiri realizoi dy gola dhe asistoi një në këtë fitore të “helvetikëve”. Ai nuk festoi golat duke bërë me duar “shqiponjën”, por në stadiumin në St. Gallen kishte frymë shqiptare, pasi ishin prezentë mjaft flamuj shqiptarë dhe flamuj të Kosovës.

“Një asist, dy gola. Me 23 vjet ka arritur në shifrën e 15 golave me përfaqësuesen. I jashtëzakonshëm”, ka komentuar gazeta “Blick” derisa i ka dhënë Shaqirit notën maksimale, gjashtë. Ai ishte lojtari më i vlerësuar te Zvicra.

Shaqiri asistoi në golin e parë të Zvicrës, ndërsa realizoi golin e tretë me një gjuajtje me kokë në minutën e 80-të, dhe golin e katërt me një gjuajtje me thembër.
Zvicra me fitoren e shënuar zë vendin e tretë në Grupin E me gjashtë pikë nga katër ndeshje, ndërsa grupin e kryeson Anglia me 12 pikë.
“Ne kemi luajtur në sulm për mrekulli, edhe pse në pjesën e parë nuk ishim aq të saktë”, ka thënë Shaqiri.

Trajneri i Zvicrës Vladimir Petkoviq ka përgëzuar gjilanasin për paraqitje.

“Jam i lumtur me fitoren. Kemi marrë tri pikë dhe kemi lënë përshtypje të mirë. Kemi luajtur siç kemi planifikuar”. (Koha Ditore)
© KOHA.net