Shaqiri kthehet i pakënaqur nga Qipro

Kombëtarja e Zvicrës, për të cilën luajnë Xherdan Shaqiri, Valon Behrami, Blerim Xhemajli, Granit Xhaka e Admir Mehmedi, është kthyer e zhgënjyer në Zurich nga Qipro, përball të cilës nuk mundi të fitoj më shumë sesa një pikë (0:0) të shtunën mbrëma – në kuadër të kualifikimeve për Botërorin ‘Brazili 2014’.

Shaqiri tregoi se skuadra e tij u nda e pakënaqur me epilogun e ndeshjes ndaj qipriotëve.

“Normalisht që nuk jemi të kënaqur me rezultatin 0:0 ndaj Qipros. Synimi ynë ishte fitorja, por nuk e arritëm përkundër rasteve të shumta që patëm për të realizuar gola. Po ashtu ndeshjen e kontrolluam gjatë 90 minutave. Andaj, nuk mund të fajësohemi që nuk jemi angazhuar për të fituar”, ka thënë mesfushori nga Gjilani për Blick.ch.

“Fatkeqësisht nuk ishim efikas para portës së Qipros. Kemi mundur të fitojmë 1:0, 2:0 apo edhe 3:0. Megjithatë ne jemi në rrugë të mirë për t’u kualifikuar në Kampionatin Botëror. Qipro do t’u shkaktoj telashe edhe ekipeve tjera të grupit tonë”, ka theksuar Shaqiri.