Shaqiri hesht kritikët

Xherdan Shaqiri tashmë është kthyer në një lojtar të rëndësishëm për Liverpoolin e Jurgen Kloppit. Strategu gjerman bëri një lëvizje të mençur kur e transferoi Xherdan Shaqirin te klubi anglez për 13.5 milionë funte nga Stoke City gjatë verës, shkruan “Sky Sports”. Kualiteti i futbollisti shqiptar, i kombinuar me përvojën në Premierligë bëjnë që ai të jetë një ujdi e leverdishme, shkruan Gazeta “Zëri”.

“Ai ka shpejtësi dhe aftësi, e ka arrogancën e duhur në fushën e futbollit, ka trimëri për të kërkuar topin dhe për t’i ndryshuar gjërat. Ai është një njeri që e bën diferencën e madhe në skuadër sepse ai mund të përshtatet në shumë pozita në sistemin tonë”, është shprehur Klopp. Gjermani e kishte vëzhguar Shaqirin që prej shpërthimit të tij te Baseli dhe nuk hezitoi fare për ta sjellë në “Anfield”, pavarësisht se kishte zëra dyshues.

Talenti i Shaqirit nuk vihej në dyshim, por çfarë mund të themi për normën e tij të punës? A do të mundë t’i plotësonte kërkesat e Kloppit ashtu siç kishte pasur vazhdueshmërinë te Stoke?

A do të mundë të arrinte të bëhej pjesë e ekipit të Liverpoolit? Këto dyshime kishin rrethuar Shaqirin në javët e para te gjigandi anglez. Shaqiri nuk u paraqit si titullar për Liverpoolin deri në shtator në takimin ndaj Southampton, derisa luajti një rol kyç në dy golat e ekipit të tij, por u zëvendësua në pjesën e dytë nga James Milner. “Nuk ishte e lehtë që të jem i sinqertë. Është puna ime të informoj për lajmin e keq që askush s’dëshiron ta marrë. Kështu ishte puna në pjesën e parë, por ai është një djalë fantastik. Problemi i vetëm ishte ana mbrojtëse”, është shprehur Klopp. Shaqiri ende po adaptohej në stilin e Kloppit, por nuk kaloi shumë kohë derisa ai shfaqi shenjat e para të progresit. Kur ai u rikthye si titullar në Premierligë ndaj Huddersfieldit një muaj më vonë, ai ishte shumë më shumë pjesëmarrës në lojën pa top.

Shaqiri nuk i kompletoi 90 minutat, por vrapimi një kilometër e gjysmë (11.5 kilometra në total) se çdo lojtar tjetër i Liverpoolit. Në fakt, ky ishte vrapimi më i gjatë që ai e kishte bërë ndonjëherë në një ndeshje të Premierligës. Kritikët e Shaqirit do të thonë se te Stoke ai nuk vraponte shumë dhe nuk i kthehej prapa për të ndihmuar mbrojtjen, por te Liverpooli ai ka dhënë një kontribut të madh për ekipin e Kloppit në taktikat për presion të lartë.

Statistikat tregojnë se ai qëndron vetëm prapa Mohamed Salahut te Liverpooli për topat që ka fituar në fazën e sulmit për ndeshje këtë edicion. Shaqiri është duke e ndihmuar Liverpoolin në lojën me top më shumë sesa do të prisnin të tjerët, por puna e tij me top ka qenë gjithashtu e shkëlqyeshme. Në vetëm 381 minuta në fushë në Premierligë ai ka realizuar 2 gola dhe 2 asistime. Të dyja golat, një ndaj Cardiffit dhe një ndaj Fulhamit, kanë qenë mjaft bukur të ekzekutuara. Ndërkohë asistimet janë si pasojë e kreativitetit mbresëlënës të tij.

Që prej largimit të Philippe Coutinhos, Liverpooli disa herë ka vuajtur me disa mbrojtje të pathyeshme. Por Shaqiri e ka ndryshuar këtë gjë. Ai ka krijuar më shumë raste nga loja e hapur në Premierligë sesa çdo lojtar tjetër i Liverpoolit. Mesatarja e tij prej 2.1 rasteve të krijuara për ndeshje e vendos atë përpara Salahut. Klopp asnjëherë nuk dyshoi tek ai, por disa të tjerë po. Katër muaj pas ardhjes së tij në “Anfield”, ai u ka treguar kritikëve se kanë gabuar me të./ZËRI