Përfaqësuesja e Zvicrës ka nisur grumbullimin në prag të dy ndeshjeve miqësore të këtij muaji.
Përzgjedhësi Murat Yakin sot në Marbella ka mbajtur edhe seancën e parë stërvitore, shkruan Gazeta Express.
Xherdan Shaqiri është një prej të grumbulluarve te “Helvetikët”, teksa ai ka marrë vëmendjen e mediave zvicerane ende pa u bashkuar me pjesën tjetër të ekipit.
“Blick” ka shkruar se futbollisti nga Kosova ka bërë udhëtimin më të gjatë, pothuajse 7000 kilometra.
30-vjeçari udhëtoi nga Chicago, pasi që nga janari ai është pjesë e skuadrës nga MLS, Chicago Fire.
Ndryshe, Zvicra miqësoren e parë do të luajë më 26 mars, në “Wembley” të Londrës kundër Anglisë, kurse tri ditë më vonë në do të përballet me Kosovën në Cyrih. /Gazeta Express/
