Shala: Mënyra se si qeveria ndau para kesh, është për t’u dyshuar

Deputeti i Kuvendit të Kosovës nga radhët e PDK-së, Ferat Shala ka komentuar çështjen e inflacionit në vendin tonë, duke hedhur kritika në drejtim të qeverisë.

Sipas tij, zbritja e pagave në një inflacion të lartë, është zhgënjyese për kuadrot profesionale. Veç kësaj, ai shtoi se në këto rrethana, goditje e madhe u është bërë punëtorëve të sigurisë.

Kur jemi te ndarja e subvencioneve me para kesh, ai tha se kjo ngjall dyshime dhe se lë vend për diskutime.

“Kemi zbritje të pagave, në kohën kur kemi inflacion të lartë. Kemi zvogëlim edhe të stazhit të punës, kemi kategorizim pa meritor, kemi zhgënjim të kuadrove të mira profesionale. Në këto rrethana, goditje e madhe i është bërë punëtorëve të sigurisë. Është e vërtetë e madhe që sektori privat është goditur dhe nuk është trajtuar fare.

Përveç disa ndihmave me para kesh. Instrumentet që ka përdorur kjo Qeveri, në pjesën e shpërndarjes së parasë kesh, janë për t’u diskutuar dhe për t’u dyshuar. Koha do ta vërtetojë që mekanizmat dhe instrumentet që ka përdorur Ministria në raport me financat e shtetit, në raport me financën publike, në raport me taksapaguesit, sinqerisht do jetë proces që do na marrë kohë për ta kuptuar të vërtetën. Por, ka elemente shumë të dyshimit”, tha ndër tjerash Shala në Tëvë1.