Shala: Menaxhmenti përfitoi nga resurset e KEK për interesa të VV’së, Ministria e Ekonomisë i mbulonte

Deputeti nga radhët e Partisë Demokratike të Kosovës, Ferat Shala, ka folur lidhur me arrestimin e Kryeshefit të KEK’ut, Nagip Krasniqit.

Shala ka thënë se menaxhmenti i KEK ka përfituar materialisht nga asetet dhe resurset e kësaj ndërmarrje për interesa individuale dhe grupore të Lëvizjes Vetëvendosje, raporton Express.

“Fatkeqësisht parim bazë i këtij menaxhmenti rezulton të jetë përfitimi material në mënyrë të organizuar në asestet dhe resurset e KEK’ut për interesa individuale dhe grupore të Lëvizjes Vetëvendosje, në krye me Kryeministrin Albin Kurti. Për të arritur synimet e veta, ky menaxhment me mbështetje të plotë deri në naivitet të Ministrisë së Ekonomisë, menaxhmenti i KEK shfrytëzoi situatën e krizës globale për lojëra dhe tregtim të energjisë me ndërmarrje tregtare brenda dhe jashtë vendit”, ka thënë Shala.

Ai ka akuzuar menaxhmentin për keqmenaxhim, duke përmendur vonesat në remontet e termocentraleve.

“Duke shpallur me qindra miliona euro tendera njëburimorë, duke vonuar remontet e termocentrale deri në 40 mijë orë pune jashtë normativit teknik, shih bllokun A5, njejtë dhe me bllokun B2, si rezultat i keqmenaxhimit të procesit të prodhimit, shkaktohen defekte dhe pastaj angazhohen ekspertë të jashtëm ku paguhen 12 mijë euro dita”, ka deklaruar deputeti i PDK’së.

Shala ka drejtuar kritika edhe ndaj Ministrisë së Ekonomisë, duke thënë se mbulonte veprimet e menaxhmentit të KEK.

“Menaxhmenti i KEK në mënyrë permanente dhe sistematike mbulohej nga Ministria e Ekonomisë, duke shpalllur shtatë herë gjendje emergjente, me të vetmin rezultat, shmangjen e procedurave të konkurrencës dhe lënien e hapësirës për negociayta në mënyrë direkte”, ka thënë Shala./Express