Shakaja shtetërore me korrupsionin

Mekanizmat u shtuan, rezultatet munguan. Pushtetit nuk i intereson ta luftojë vetveten .

“Në vazhdimësi tash e shumë vjet kemi të njëjtën gjendje të korrupsionit në nivel vendi, duke mos shënuar ndonjë performancë pozitive. Nuk ka asnjë rast kompleks të korrupsionit, i cili është adresuar seriozisht dhe i cili ka një aktvendim përfundimtar nga ana e gjykatave”, deklaroi Albana Rexha, nga Grupi për Studime Juridike dhe Politike

Nuk ka raport ndërkombëtar apo vendor që nuk përmend prezencën alarmante të korrupsionit në Republikën e Kosovës. Lufta institucionale kundër korrupsionit dhe krimit ka kohë që shfaqet si prioritet nëpër agjendat e atyre që udhëheqin vendin tonë. Shumë herë puna e institucioneve përgjegjëse u kritikua dhe Kosova vazhdon të ketë ngecje të dukshme, shteti ende është pothuajse i gjunjëzuar para korrupsionit dhe krimit aq të pranishëm në çdo cep.

Korrupsioni edhe 8 vjet pas shpalljes së pavarësisë mbetet tema më e përfolur e politikave ditore, por edhe afatgjata. Një nga kriteret kyçe që duhet plotësuar për anëtarësim në Bashkimin Evropian është luftimi i korrupsionit të nivelit të lartë te zyrtarët publikë, por institucionet shtetërore kanë shumë për të bërë në këtë drejtim. Korrupsioni i nivelit të lartë është sfidues për drejtësinë e pareformuar. Strategji dhe mekanizma të shumtë janë krijuar për të luftuar këtë dukuri, por rezultatet janë dëshpëruese. Shteti i Kosovës në indeksin e matjes së korrupsionit në institucionet publike të bërë nga “Transparency International” nuk ka shënuar asnjë përparim në vitin 2015, krahasuar me atë të vitit 2014./kosova sot/