Shaip Surdulli kujton dëshmorin Asllan Thaçi: 11 maji 1999, një nga ditët më të rënda për Karaçevën dhe Kamenicën

Kamenicë – Ish-veprimtari dhe bashkëkohësi i luftës, Shaip Surdulli, ka përkujtuar dëshmorin e kombit Asllan Thaçi dhe të gjithë të rënët e 11 majit 1999, duke e cilësuar atë datë si një nga ditët më të kobshme për Karaçevën e Poshtme dhe komunën e Kamenicës.

Surdulli rikujtoi se para 27 vitesh, në luftën për lirinë e Kosovës, ranë dëshmorë shumë bij të Anamoravës, ndër ta Asllan Thaçi nga Karaçeva e Poshtme, Ismajl Ismajli nga Kopernica, Emin dhe Selver Kryeziu nga Rogana, të cilët ranë në zonën e Kosharës, si dhe Nevzad Kryeziu nga Rogana, Mehmet Sabadini dhe Ramadan Latifaj nga Hogoshti.

Sipas tij, ajo ditë u shënua edhe nga dhuna e forcave serbe të regjimit të Slobodan Millosheviqit, të cilat, përveç vrasjeve, ushtruan maltretime ndaj shqiptarëve, dogjën shtëpi dhe plaçkitën familje shqiptare në zonën e Kamenicës.

Duke folur për Asllan Thaçin, Surdulli theksoi se me të kishte ndarë jo vetëm vendlindjen dhe gjeneratën, por edhe aktivitetin politik e solidar në kuadër të LDK-së dhe organizimeve humanitare të kohës.

“Me Asllanin kemi qenë bashkëvendës, shokë gjenerate dhe bashkëveprimtarë në aktivitetet kombëtare e humanitare. Ai ishte njeri i përkushtuar dhe patriot i devotshëm”, është shprehur Surdulli.

Ai vlerësoi edhe familjen që ka lënë pas dëshmori, duke theksuar se djemtë e tij, Urimi dhe Urani, si dhe vajza Uresa, kanë ndërtuar familje të mrekullueshme dhe po e ruajnë me krenari kujtimin për babanë e tyre.

Në fund të mesazhit të tij përkujtimor, Shaip Surdulli ish kryetar i Kamenicës shprehu nderim për të gjithë dëshmorët e rënë për lirinë e Kosovës.

“Lavdi e përjetshme për dëshmorin e kombit Asllan Thaçi dhe për të gjithë dëshmorët tjerë!”, ka shkruar ai./rajonipress/