Shaip Surdulli kandidat i LDK-së për kryetar të Komunës edhe për një mandat

Gjilan – Dega e LDK-së në Kamenicë në mbledhjen e kryesisë së degës me kryetar të nëndegëve ka vendosur unanimisht që kandidat i LDK-së për kryetar Komune edhe për një mandat të jetë Shaip Surdulli, kryetar i Degës së LDK-së dhe aktualisht kryetar i komunës.

Propozimin për kandidat për kryetar e bëri nënkryetari i Degës së LDK-së , Nexhat Rexha i cili më këtë rast tha se dega e LDK-së në Kamenicë ka dhënë shembullin më të mirë në nivel të Kosovës. “Tubimet e fundit të mbajtura në nëndegët e LDK-së tregojnë qartë se ne si Degë nuk kemi dilema dhe kryetar i komunës për mandatin e ardhëm padyshim që do të jetë kryetari Shaip Surdulli” tha Rexha.

Në mbledhje ka prezantuar edhe nënkryetarja e LDK-së , Teuta Sahatqiu dhe anëtari i kryesisë Arsim Janova të cilët përcollën procesin e nominimit të kandidatit për kryetar të Komunës për zgjedhjet lokale të këtij viti.

Me këtë rast Teuta Sahatqiu tha se Kamenica është model i mirë se si punohet dhe besimi që po i jepni kryetarit Shaip Surdulli e dëshmon përkushtimin e tij për punë dhe besimi i juaj është garanci për fitore të reja. “Neve si Kryesi e LDK-së na e keni lehtësuar punën dhe këtu sot po e shoh që kryetari Surdulli ka mbështetjen e fuqishme të strukturave të LDK-së” ka shtuar Sahatqiu

Ndërsa Shaip Surdulli tha se mbështetjen që po e merr nga dega e LDK-së dhe e gjithë anëtarësia e sheh edhe si privilegj, por edhe si përgjegjësi. “Ju falënderoj të gjithëve që më dhatë besimin që të jem kandidat i LDK-së për kryetar Komune edhe për një mandat. Besoj fuqishëm se LDK-ja së bashku me juve do t`i fitojë zgjedhjet lokale të këtij viti , por edhe nacionale të vitit të ardhshëm sepse përditë e më shumë po shtohet përkrahja për LDK-në me ardhjet e reja në këtë subjekt politik” ka shtuar Surdulli./rajonipress/