Shaban Arifit i ka kaluar gjysma e jetës nëpër Gjykata e institucione

Gjilan – Shaban Arifi i ka 73 vite dhe ende i duhet të bredhë poshtë e lartë nëpër Gjykata e zyra të komunës së Vitisë për të bërë bartjen e një prone. Arifi fajëson Gjykatën dhe një pjesë të komunës së Vitisë të cilët sipas tij po e zhagisin lëndën e tij pa asnjë arsyeje.

Shaban Arifi është nga Budrika e Vitisë kurse me vendbanim është në Gjilan. Edhe pse në moshë të shtyrë atij i duhet të ecë poshtë e lartë dyerve të institucioneve gjyqësore e komunale për të realizuar një të drejtë, të cilën tash e 20 vite nuk mundet ta realizojë.

Arifi thotë se ka një problem pronësie që nuk po mundet ta bëjë bartjen në emër të tij. “Tokën e kam punuar gati 50 vite, por bartjen ende se kemi bërë, janë rreth 64 ari krejt. Komuna po thonë s`ka faj Sokol Haliti kurse Sokoli po thotë unë s`jam fajtor sepse ky ndërrim ka ndodhur në vitet 1967/68. Komuna atëherë e ka dhënë tokën, por bartja s`është asnjëherë dhe kjo i takon kohës së Ekrem Arifit” shprehet Arifi.

Arifi thotë se nuk e ka ndërmend të lëshojë pe. “Unë se lëshojë tokën dhe ende e punojë. Ka afër 20 vite që endem poshtë e lartë dhe puna nuk po kryhet. Avokati i komunës po e zvarritë lëndën kurse Gjykata nuk po tregohet efikase edhe pse i kam qitën gjeodetët disa here në teren” shton ai./rajonipress/