Sevdail Haziri nuk ndalet, rruga po ndërtohet dhe shpejt do të jetë e qarkullueshme
Gjilan – Sevdail Haziri afarist i suksesshëm në Gjermani, por që është lindur në Suharnë, ka nisur aksionin dhe iniciativën për ta hapur rrugën e gjatë 15 kilometërshe. Unë edhe pa ndihmën e komunës do e bëjë gati këtë rrugë sepse banorët e atjeshëm kanë nevojë urgjente. Jam i vendosur që vërtet ëndrrën time ta bëjë realitet, edhe pse kam shpresa se Komuna e Bujanocit do ta përkrah këtë aksion, sa human aq edhe patriotik e atdhedashës thotë ai.
Sevdail Haziri edhe pse ndodhet në Gjermani, ai çdo ditë e përcjell punën që po kryhet në rrugën e Suharnës. Çdo ditë jep udhëzime se si të punohet rruga dhe është organizatori kryesor edhe për dhënien e mjeteve financiare. “Unë i jam falënderues mërgimtarëve, miqve të mi të cilët nuk kanë hezituar asnjëherë për ta përkrahur aksionin e rrugës. Por jam i vendosur që edhe me mundësit e mija financiare ta realizojë ëndrrën time, që kjo rrugë të bëhet e kalueshme, që kjo rrugë ta kthejë gjallërinë e banoreve të Suharnës” tha Haziri për rajonipress.
Sevdaili shpjegon se rruga po ndërtohet me standarde dhe se brenda dy javësh ajo mund të përfundojë. “Ne po e hapim rrugën me eskavator dhe shpenzimet janë vërtet të mëdha, por vullneti im i madh dhe përkrahja e mërgimtarëve po më japin vullnet e energji, që këtë rrugë ta përfundojmë. Unë shpresoj që në mars ndoshta edhe komuna e Bujanocit do të angazhohet sepse deri tashti asnjë zyrtar komunal nuk ka dalur ta shoh rrugën. Kjo vërtet po më pengon sepse vet Nagip Arifi u ka premtuar banorëve se nëse kryhen punimet e vrazhda, komuna do ta shtrojë me zhavorr. Është për gjynah kur i sheh ata pak banorë që kanë mbetur dhe nuk kanë asnjë përkrahje institucionale” u shpreh Haziri.
Ndryshe banorët e Suharnës dhe në veçanti ata që janë në mërgim po e shohin me shumë shpresë rregullimin e rrugës 15 kilometërshe.
Sevdail Haziri thotë se edhe në këto momente njerëzit po e përkrahin aksionin dhe po japin kontributin e tyre.
Ndërkaq komuna e Bujanocit ende nuk është përgjigjur në pyetjen e rajonipress se a do të ndihmohet në mënyrë institucionale financimi i kësaj rruge.
Nagip Arifi ende po heshtë dhe nuk po përgjigjet në pyetjen e rajonipress, edhe pse banorët e atjeshëm thonë se komuna e Bujanocit mund ta vendos si prioritet në buxhetin e komunës për vitin 2021./rajonipress/