Sergjan Mitroviq tregohet i guximshëm edhe në Asamblenë Komunale, Bunjaku kërkon përjashtimin e tij

Gjilan – Sergjan Mitroviq pos që ka provokuar me rastin kur ai është betuar tek strukturat paralele për të qenë gjoja kryetar paralel i Gjilanit, ai arrogancën e tij e ka treguar edhe në seancën e Kuvendit Komunal. Valentina Bunjaku Rexhepi ka kërkuar që Sergjan Mitroviq ta lirojë sallën e Kuvendit, derisa vet Sergjan Mitroviq tha se nuk e merr parasysh kërkesën e saj.

Valentina Bunjaku Rexhepi ka kërkuar nga Sergjan Mitroviq që të definoj qartë nëse mbetet vetëm anëtar i Kuvendit, ose në të kundërtën ai duhet ta lirojë sallën e Kuvendit.”Nëse jeni anëtar vetëm i Kuvendit Komunal mund të qëndroni nëse jo duhet ta lironi sallën. Kuvendi Komunal kërkon që Mitroviq të jap dorëheqje ose ta respektojë rregulloren e Kuvendit Komunal. Nuk është e ndershme që një anëtar i një Kuvendit ta bllokoj punën e tërë Kuvendit” tha Bunjaku.

Kurse Arben Mehmeti tha se vendimi i Kuvendit është i vonshëm sepse veprimi i Sergjanit e ka cenuar rëndë legjislacionin Republikës së Kosovës duke zyrtarizuar funksionimin e tij në strukturat paralele. “Na ka provokuar bukur shumë Sergjani dhe atij s’është dashur fare t`i lejohet hyrja sot në Kuvend. Veprimet e tija i kanë cenuar ligjet e Kosovës. Ai duhet të mbetet jashtë sistemit të Kuvendit Komunal” tha Mehmeti.

Kuvendi ka ndërprerë punimet për të vendosur për rastin e Mitroviqit./rajonipress/